«Batys Qazaqstan oblysynyń barysy» anyqtaldy
ORAL. QazAqparat - Aqsaı qalasynda «Batys Qazaqstan oblysynyń barysy» anyqtaldy, dep habarlaıdy QazAqparat tilshisi.
«Qazaqstan barysy» týrnıriniń oblystyq kezeńi alǵash ret Aqsaıda ótip, oǵan aýdandardan bir-birden jáne Oral qalasynan eki palýan qatysyp, baq synady.
Barynsha qyzý ótken saıys barysynda kútpegen nátıje de bolmaı qalǵan joq. Mysaly, ótken jyly «Qazaqstan barysy» týrnırine qatysqan qaztalovtyq Ernazar Hamzın shırek fınalda syrymdyq Asqar Nurmuhanovtan jeńilip qaldy.
Bıylǵy jarystaǵy jańa esim dep oraldyq jıyrma jasar Bekaıdar Meńdeshevti aıtýǵa bolady. Ol jartylaı fınalǵa deıin súrinbeı jetkenimen, sodan keıin otyz bir jasar tájirıbeli palýan A.Nurmuhanovqa ese jiberdi. Ekinshi jartylaı fınalda Bórli aýdanynyń ókili Temirlan Kólbaı taǵy bir oraldyq Oljas Súleımenovti utty.
Qola júlde úshin báseke asa tartysty ótip, negizgi ýaqytta eki palýan teń túskennen keıin qoıan-qoltyq beldesýde B.Meńdeshevtiń baǵy jandy.
Fınalda salmaǵy shamalas T.Kólbaı men A.Nurmuhanov kúresti. Temirlan - nebári 23 jasta bolǵanymen, budan buryn «Qazaqstan barysy» týrnırine qatysyp úlgergen ári dzıýdodan da olja salyp júrgen Qazaqstan quramasynyń múshesi. Bul beldesýde de ol qarsylasyn taza jeńip, «Batys Qazaqstan oblysynyń barysy» atandy. Sóıtip ol A.Nurmuhanovpen birge shilde aıynda Elbasy júldesi úshin Astanada ótetin «Qazaqstan barysy» týrnırine joldama aldy.
Aıta keteıik, 2017 jyly «Qazaqstan barysyna» BQO-dan T.Kólbaı men E.Hamzın qatysqan bolatyn.
