Batys Qazaqstan oblysynyń ákimdigi 160 túlekke bilim grantyn bóldi
ORAL. QazAqparat - Batys Qazaqstan oblysynda mektep bitirgen 160 túlek jergilikti bıýdjet esebinen bilim grantyna ıe bolmaq. Bul týraly oblys ákimi Altaı Kólginovtiń tóraǵalyǵymen ótken keńesten keıin belgili boldy, dep habarlaıdy «QazAqparat» tilshisi.
Oblystyq basqarmalar men joǵary oqý oryndarynyń basshylary qatysqan jıynda óńir basshysy jergilikti bıýdjet esebinen bilim granttaryn bólýdiń mańyzdylyǵyn aıta otyryp, suranysqa ıe mamandyqtar boıynsha naqty tizim jasaýdy tapsyrdy.
Qazirgi tańda medıtsına, pedagogıkalyq, aýyl sharýashylyǵy mamandyqtaryna suranys kóp, sondaı-aq dintanýshy mamandardyń da jetispeýshiligi baıqalady. Osy tusta aıta ketý kerek, oblystyq bıýdjet esebinen bólingen bilim granttary negizinde oqyǵan stýdentter oqýlaryn aıaqtaǵannan keıin Batys Qazaqstan oblysyna kelip, eńbek etýleri mindetti.
Keńes qorytyndysynda oblystyq bıýdjet esebinen 160 mektep túlegine bilim granttaryn bólý jóninde sheshim qabyldandy. Al grant ıelerin joǵary oqý ornyna qujattaryn tapsyrǵan mektep túlekteriniń arasynan arnaıy komıssııa anyqtaıtyn bolady.
«Jergilikti bıýdjet esebinen bólingen bilim granttary boıynsha bilim alǵan túlekter bolashaqta oblysymyzdaǵy maman tapshylyǵyn joıýǵa septigin tigizeri anyq. Sondyqtan bilim granttaryn bólý máselesine asqan jaýapkershilikpen qaraýdy tapsyramyn», - dedi oblys əkimi A.Kólginov.
