Batys Qazaqstan oblysyndaǵy kıikterdiń jappaı qyrylýyna baılanysty qylmystyq is qozǵaldy

Bul týraly búgin QR Bas prokýratýrasynyń resmı ókili Nurdálet Súıindikov BAQ ókilderimen bolǵan baspasóz máslıhaty barysynda aıtty.

«Batys Qazaqstan oblysyndaǵy aqbókenderdiń jappaı qyrylýyna baılanysty keshe, mamyrdyń 26-sy kúni BQO prokýratýrasy QR QK 289 babyna sáıkes, janýarlar álemin qorǵaý erejesiniń buzylýy faktisi boıynsha qylmystyq is qozǵady», dep málim etti resmı ókil.

Onyń aıtýynsha, qazirgi ýaqytta janýarlardyń jappaı qyrylýy olardyń pasterellez juqpaly aýrýyna shaldyǵýy sebep retinde qarastyrylýda. Alaıda sebep-saldaryn anyqtaý barysynda birqatar saraptamalardyń júrgizilýi qajettigin eskere otyryp jáne basqa da jaıttardyń bolý-bolmaýyn anyqtaý maqsatynda qylmystyq is qozǵalǵanyn atap ótken ol: «osy jaıttar qylmystyq isti tergeý barysynda anyqtalatyn bolady. Tergeý ishki ister organdaryna tapsyryldy. Onyń júrgizilýi oblystyq jáne QR Bas prokýratýrasynyń qadaǵalaýynda bolady», dedi.

N.Súıindikovtiń sózine qaraǵanda, Bas prokýratýra aqbókenderdiń jappaı qyrylýynyń múmkin bolatyn birneshe nusqalaryn qarastyryp otyr. Janýarlar álemin qorǵaý, óndiristik úrdisterdi júzege asyrý erejeleriniń, sonymen qatar ósimdikterdi qorǵaý barysynda qoldanylatyn mıneraldyq tyńaıtqyshtardy durys paıdalanbaý kıikterdiń jappaı qyrylýyna sebep bolýy múmkin.