Batys Qazaqstan oblysyndaǵy Bórli aýdanynda tótenshe jaǵdaı jarııalandy
BQO TJD baspasóz qyzmetinen túsken málimetke qaraǵanda, Bórli aýdany ákiminiń 11 naýryzdaǵy sheshimimen eldi mekenderdi, tirshilikti qamtamasyz etý nysandaryn sý basý qaýpine baılanysty jergilikti aýqymdaǵy tabıǵı sıpattaǵy tótenshe jaǵdaı jarııalandy.
Oral qalasy ákimdiginiń aqparaty boıynsha komıssııalyq tekserýden keıin 8 turǵyn úıdi sý basqany anyqtaldy. Qazirgi ýaqytta barlyq meken-jaılardan sý soryldy.
Oral qalasyna qosa Aqjaıyq, Bórli, Tasqala, Terekti, Syrym jáne Báıterek aýdanynda sý sorý jumystary atqarylyp jatyr.
«11 naýryz kúni tikushaqpen Oral qalasy, Tasqala jáne Báıterek aýdandary baqylandy. Derkól, Shaǵan jáne Shejin-2 ózenderi men basseınderiniń jaı-kúıi zertteldi. Sondaı-aq, osy ózenderdiń boıynda ornalasqan eldi mekenderge monıtorıng júrgizildi», - dep habarlady vedomstvodan.
Eske sala keteıik, budan buryn Oral qalasy men eki aýdanda sý tasqynyna baılanysty tótenshe jaǵdaı jarııalanýy múmkin ekendigin jazǵan bolatynbyz.
Sondaı-aq, Batys Qazaqstanda ózenderde sý deńgeıi kóterilip jatqany habarlandy.