Batys Qazaqstan oblysynda úzdik sportshylar men bapkerler marapattaldy
ORAL. QazAqparat – Qadyr Myrza Álı atyndaǵy oblystyq mádenıet jáne demalys ortalyǵynda jyl qorytyndysyna arnalǵan jıyn bolyp, onda úzdik sportshylar men bapkerler marapattaldy, dep habarlaıdy QazAqparat tilshisi.
Jıynda BQO Dene shynyqtyrý jáne sport basqarmasynyń basshysy Qaımen Esendııarovtyń atap ótkenindeı, bıyl karantındik shekteýlerge baılanysty kóptegen sportshylar álemdik, halyqaralyq jarystardan tys qalyp, óz deńgeılerin kórsete almady.
Soǵan qaramastan, batysqazaqstandyq sportshylar Qazaqstan chempıonattarynda joǵary nátıjelerge qol jetkize bildi.
Atap aıtqanda, áıelder kúresinen Rıo olımpıadasynyń qola júldegeri Ekaterına Larıonova Qazaqstan chempıonatynda ekinshi, Anastasııa Panasovıch úshinshi orynǵa ıe boldy.
Taıaýda ǵana Aqtaý qalasynda eresekter arasynda dzıýdodan márege jetken el birinshiliginde Ańsarbek Ǵaınýllın kúmis, Toqtar Úmitálıev pen Gúldana Álmuhanbetova qola medaldi jeńip aldy.
Jyldyń basty sensatsııasy – 18 jastaǵy Danııal Sábıt Shymkent qalasynda erler arasynda ótken QR chempıonatynda aıdy aspanǵa shyǵaryp, 49 kg salmaqta jeńimpaz atandy. Sóıtip ol Azııa, álem birinshilikterinde el namysyn qorǵaýǵa múmkindik aldy.
Sondaı-aq grossmeıster Murtas Qajyǵalıev Almatyda klassıkalyq shahmattan Qazaqstan chempıonaty men el kýbogy úshin ótken jarysta top jardy.
Adam múmkindiginiń shegi joqtyǵyn marafonshy Baýbek Іlııasov kórsetti. Ol Táýelsizdik meıramyna oraı Oraldan Shyńǵyrlaý aýdany Aqsýat aýyldyq okrýgindegi sarqyramaǵa deıingi 230 shaqyrym qashyqtyqty toqtaýsyz júgirip ótti.
«Qazaqstan Prezıdenti bıylǵy Joldaýynda buqaralyq sportty damytý kerektigin, sonyń ishinde óńirlerde sport keshenderin salý, olardy halyqtyń ıgiligine berip, qoljetimdi etý qajettigin atap kórsetken bolatyn. Osyǵan oraı oblys ákiminiń ókimimen sanıtarlyq talaptardy saqtaı otyryp, mektepterdiń, kolledjderdiń sport zaldary jumys kúnderi keshki ýaqytta, senbi, jeksenbide kúni boıy turǵyndarǵa dene shynyqtyrý úshin berilip otyr. Bul da – sportpen aınalysamyn deýshilerge qosymsha múmkindik», dedi Qaımen Esendııarov.
Onyń aıtýynsha, aldaǵy jyl olımpıada jyly bolǵandyqtan, sportshylar men bapkerlerge joldama jeńip alý úshin tynbaı eńbektenýge týra keledi.
Ázirge Batys Qazaqstan oblysynan sporttyq júristen Georgıı Sheıko men sý dobynan ulttyq qurama qaqpashysy Pavel Lıpılınde joldama bar. Lıtsenzııadan eskek esý sheberi Andreı Ergýchev jáne basqa sportshylar úmitti.
Jıyn barysynda sala úzdikterine oblys ákiminiń alǵyshattary, QR Mádenıet jáne sport mınıstrliginiń, oblystyq basqarmanyń marapattary tabys etildi.
Eske sala keteıik, budan buryn batysqazaqstandyq jelaıaqtyń 230 shaqyrym qashyqtyqty júgirip ótkenin jazǵan bolatynbyz.
