Batys Qazaqstan oblysynda shekaradaǵy jaǵdaı turaqtaldy
QR UQK Shekara qyzmeti departamentiniń bastyǵy Baýyrjan Rysbekov qazirgi tańda shekara beketterinde ahýaldyń durystalǵanyn, túıtkildi másele joqtyǵyn jetkizdi.
BQO polıtsııa departamenti bastyǵynyń birinshi orynbasary Janbolat Janshınniń aıtýynsha, 21 qyrkúıekten beri óńir aýmaǵyna ótkizý beketteri arqyly 54 myńnan astam reseılik azamat kirse, sonyń 42 myńy – 18-55 jas aralyǵyndaǵy er adamdar. Kelgenderdiń ishinen 17 myńy resmı tirkelse, 7 296-sy halyqqa qyzmet kórsetý ortalyǵyna JSN alý jóninde ótinish bergen.
J. Janshınniń sózine qaraǵanda, sheteldik azamattardy qabyldaýǵa baılanysty zańnamany buzǵan 70 qazaqstandyqqa qatysty QR Ákimshilik quqyq buzýshylyq týraly kodeksiniń 518-babyna sáıkes ákimshilik hattama toltyryldy.
Sondaı-aq, Oral qalasynda reseılikterdiń qatysýymen úsh qylmys jáne bir usaq buzaqylyq tirkeldi. Sonyń ishinde túngi klýb janyndaǵy tóbeleske qatysqan tórt reseılik ustaldy. Olar bes táýlikke qamalǵan bolatyn. Oral qalasynyń mamandandyrylǵan ákimshilik soty «Sheteldikterdiń quqyqtyq jaǵdaıy týraly» QR Zańynyń 28-babynyń negizinde QR zańnamasyn buzǵany úshin oqıǵanyń barlyq qatysýshylaryn respýblıka aýmaǵynan shyǵarý týraly sheshim qabyldady.
Oblys ákimi Ǵ. Esqalıev málim etkenindeı, óńirge keıingi eki aptada Reseıden kelgenderdiń 13 myńy birden ketip qalǵan. Olar basqa aımaqtarǵa, sonymen qatar shet elderge attanǵan.
«Biz qalǵan adamdardyń kim ekendigin tolyq anyqtaýymyz kerek. Olardyń arasynda qylmysqa qatysy barlary bolýy múmkin. Eger joǵary bilikti mamandar bolsa, bos oryndarǵa jumysqa qabyldaý máselesi qarastyrylady. Alaıda, biz olarǵa erekshe jaǵdaı jasamaımyz. Áleýmettik jelide biz reseılikterge arnaıy jumys oryndaryn ashyp jatqandaı áńgime aıtylyp jatyr. Bul olaı emes. Bos oryn bolsa, oǵan ultyna qaramastan, kez kelgen adam ornalasa alady. Osy kúnderi memlekettik jáne quqyq qorǵaý organdarymen qatar eriktiler, kásipkerler, basqa da azamattar tynyshtyqtyń saqtalýyna úles qosty. Ókinishke qaraı, ardy oılamaı, paıda kózdep, batysqazaqstandyqtardy páterden shyǵaryp, ony reseılikterge bergender de boldy. Sol sekildi keıbir taksı júrgizýshileri baǵany áldeneshe ese ósirip, kóp aqsha qarmap qalýǵa tyrysty. Tipti, olar bılik ókilderiniń zańdy talaptaryna baǵynǵysy kelmedi. Aldaǵy ýaqytta páterin zańsyz jalǵa berýshilerge 140 myń teńgege deıin aıyppul salynatyn bolady. Taksı júrgizýshileriniń qyzmetin baqylaý da kúsheıtiledi», - dep túıindedi keńesti Ǵalı Esqalıev.
Eske sala keteıik, budan buryn BQO ákiminiń shekarada qalyptasqan ahýalǵa baılanysty jıyn ótkizgenin jazǵan bolatynbyz.
