Batys Qazaqstan oblysynda ormanǵa kirýge shekteý engizildi
BQO orman sharýashylyǵy jáne janýarlar dúnıesi aýmaqtyq ınspektsııasynan málim etkenindeı, kúnniń ysı túsýine jáne ormandarda joǵary órt qaýpine baılanysty oblys ákimdiginiń qaýlysyna sáıkes «Órt qaýpi joǵary kezeńde jeke tulǵalardyń ormanda bolýyna jáne oǵan kólik quraldarymen kirýine, sondaı-aq Batys Qazaqstan oblysynyń memlekettik orman qorynyń aýmaǵynda jekelegen jumystardy júrgizýge» shekteýler engizildi.
«Ormandarǵa barýǵa tyıym salý nemese shekteý engizý azamattardyń qaýipsizdigin, olardyń múlkiniń, sondaı-aq orman qorynyń saqtalýyn qamtamasyz etýge baǵyttalyp otyr. Sheshim aýa temperatýrasynyń kóterilýi, jaýyn-shashynnyń bolmaýy, jeldiń kúsheıýi sekildi kún raıy faktorlarynyń negizinde qabyldanady.
Aýa raıy turaqtalǵannan keıin ormanǵa barýǵa salynǵan tyıymdar men shekteýler alynyp tastalady.
Shekteý saǵat 10.00-den 21.00-ge deıin qoldanylady. Orman sharýashylyǵymen aınalysatyn zańdy tulǵalardyń, baqylaýshy organdardyń kólikterin qospaǵanda, basqa kólik quraldarynyń toǵaıǵa kirýine, azamattardyń ormanda osy salaǵa qatysy joq jumystardy júrgizýine tyıym salynady. Inspektsııa QR Ákimshilik quqyqbuzýshylyq kodeksi 367-babyna sáıkes qurǵaq shópterdi jaǵý, ashyq otty paıdalaný jáne ot jaǵý tártibin retteıtin órt qaýipsizdigi talaptaryn buzý ákimshilik aıyppul salýǵa ákep soǵatynyn eskertedi»,- dep habarlady vedomstvodan.
Inspektsııa málimeti boıynsha BQO-da memlekettik orman qorynyń jalpy alańy 219 myń 923 gektar bolsa, sonyń 89 576 gektary toǵaımen kómkerilgen.
