Batys Qazaqstan oblysynda qar qursaýynan 12 adam qutqaryldy

ORAL. QazAqparat – Batys Qazaqstan oblysynda qar qursaýynda qalǵan 12 adam qutqaryldy, dep habarlaıdy QazAqparat tilshisi.

BQO Tótenshe jaǵdaılar departamentiniń baspasóz qyzmetinen málim etkenindeı, oqıǵa 20 aqpan kúni túste Shyńǵyrlaý aýdany aýmaǵynda boldy.

Saǵat 12.58-de Aqtaý aýyly mańynda úsh avtokólik batyp, qar qursaýynan shyǵa almaǵan.

Oqıǵa ornyna №23 órt sóndirý beketiniń qyzmetkerleri (3 adam, 1 tehnıka) men «Ernar» sharýa qojalyǵynan 2 adam 1 tehnıkamen baryp, qolushyn sozdy.

Adamdar men úsh avtokólik Shyńǵyrlaý aýylyndaǵy jylytý pýnktine jetkizildi. 12 adam qutqarylsa, sonyń jeteýi – balalar.

Eske sala keteıik, budan buryn Batys Qazaqstanda aýa raıynyń nasharlaýyna baılanysty joldar jabylǵanyn jazǵan bolatynbyz.