Batys Qazaqstan oblysynda dárigerlerdiń jetispeýshiligi joıylady
ASTANA. QazAqparat - Bıyl Batys Qazaqstan oblysynda dárigerlerdiń jetispeýshiligi joıylady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Batys Qazaqstan oblysynyń ákimi Nurlan Noǵaev málim etti.
«Densaýlyq saqtaý salasyna 22 mlrd. 200 mln. teńge bólindi jáne oblystaǵy densaýlyq saqtaý mekemelerin qajetti qural-jabdyqtarmen qamtamasyz etý 77 paıyzdy quraıdy. Sonyń nátıjesinde ortasha ómir jasynyń uzaqtyǵy óńirde 71.1 jasty qurap otyr», - dedi ol.
Onyń atap ótýinshe, ótken jyly óńirge 87 jas maman kelip, 54-i aýyldyq jerlerge jiberilgen. Jalpy, óńirde densaýlyq saqtaý salasyndaǵy maman jetispeýshiligi 56 adamdy quraıdy.
«Biz Aqtóbedegi Marat Ospanov, Almatydaǵy Asfendııarov atyndaǵy, Qaraǵandydaǵy jáne basqa da oblystardaǵy medıtsınalyq joǵary oqý oryndarynyń túlekterine páter berý jáne basqa da áleýmettik qoldaýlardy kórsete otyryp, osy máseleni 2016 jyly tolyǵymen sheshemiz», - dedi oblys basshysy.
