Batys Qazaqstan oblysynda «Altyn taǵa» ıegerleri anyqtaldy

ORAL. QazAqparat - Oral qalasyndaǵy Qadyr Myrza Álı atyndaǵy mádenıet jáne óner ortalyǵynda «Altyn taǵa» jyldy qorytyndylaý is-sharasy ótip, úzdik atbegiler marapattaldy, dep habarlaıdy QazAqparat tilshisi.

BQO «Báıge» federatsııasynan málim etkenindeı, bıyl óńirde jalpy júlde qory 40 mln teńgeni quraǵan 60-tan astam báıge uıymdastyryldy.

Aq Jaıyq atbegileri kórshiles Aqtóbe, Atyraý jáne Almaty, Astana qalalarynda ótken báıgelerde júldeli oryndarǵa ıe boldy. Óńirde báıge sporty qarqyndy damyp, aýdan-aýyldarda shabandozdar mektebi qalyptasyp keledi.

Іs-sharada sóz alǵan oblys ákiminiń orynbasary Baqytjan Narymbetov ulttyq sportty, sonyń ishinde báıgeni damytyp júrgen azamattarǵa alǵys aıta kele, aldaǵy ýaqytta federatsııa jumystaryn birizdendirý, jarystar ótkizýdi júıeleý, jan-jaqty qoldaý boıynsha birqatar josparlar jasaqtalyp jatqanyn tilge tıek etti.

Jyl boıy báıgeler uıymdastyryp, ótkizý, ulttyq sportty qoldaý boıynsha úzdik dep tanylǵan Aqjaıyq, Terekti, Bórli aýdandyq federatsııalary, elimizde tuńǵysh ret ótken «Uly dala joryǵy» báıge-marafonynda óńir namysyn qorǵaǵan «Aq Jaıyq» komandasynyń músheleri BQO ákiminiń alǵyshatymen marapattady.

QR Mádenıet jáne sport mınıstrligi Ulttyq sport túrleri ortalyǵynyń bólim basshysy Altaı Bımen Batys Qazaqstan oblystyq «Báıge» federatsııasynyń júıeli jumysyn, atbegilerdiń aýyzbirshiligin, ózgelerge úlgi etetin isterin kórip otyrǵanyn jetkizdi.

«At sporty – fanatızmmen damıtyn sport dese de, memleket árqashan óz qoldaýyn kórsetedi. Mınıstrliktiń bul baǵytta aýqymdy josparlary bar. Sonyń barlyǵyn sizdermen birlese nátıjeli uıymdastyramyz degen senimdemiz», - dedi ol.

Budan keıin Batys Qazaqstannan túlep ushqan jas shabandoz, qazirgi tańda Qaraǵandy óńirinde báıgege shaýyp, eki márte QR Prezıdent kýboginiń ıegeri bolǵan Mırlan Nurbolatovqa «Úzdik sheber shabandoz» jáne federatsııa reıtıngisi boıynsha 2022 jyldyń úzdik shabandozdary atanǵan Aısultan Mırazat, Erjigit Jaıyqbaı, Saıat Serikbaıǵa dıplomdar men altyn taǵalar tabystadly.

Almatydan arnaıy kelgen QR «Báıge» federatsııasynyń prezıdenti Murat Óserbaı óńirdiń at sportyna eleýli úlesin qosqan, ózinen keıingi atbegilerge aqyl-keńesin berip kele jatqan Qubaıdolla Sasyqpaev, Muhtar Shúlıev, Marat Muqtarovqa shapan japty.

Federatsııanyń 2022 jylǵy qorytyndysy boıynsha kaztalovtyq Bekzat Omarǵalıevtiń «Aqjaýyn» atty taıy «Úzdik taı», aqjaıyqtyq Ashat Qameshovtyń «Juldyz» nyspyly tulpary «Úzdik qunan» atansa, kaztalovtyq Erbol Qııasovtyń «Dúldúli» top báıgesiniń úzdigi, báıterektik Bolat Jańabaevtyń «Sılvııasy» alamannyń úzdigi dep tanyldy, al «Jyldyń úzdik bapkeri» retinde aqjaıyqtyq Azamatov Bektas marapattaldy.

Sonymen qatar óńirde sporttyq attardy suryptap, qoltýma attardy ózimizdiń otandyq ónim retinde damytýdy qolǵa alyp júrgen terektilik Ámirjan Bekenov, kaztalovtyq Nurbolat Ádıetov, tasqalalyq Naýryzǵalı Aıapbergenovke «Qazaq Golden Steed» kompanııasynyń alǵyshattary tabystaldy.

Kesh barysynda oblystyq «Báıge» federatsııasynyń prezıdenti Berik Esenǵalıev óńirde báıgeler uıymdastyrý júıeli jolǵa qoıylǵanyn, 2022 jyly jarystardy ótkizýde aýdan ákimdikteri men óńirdiń belgili kásipkerleri úlken qoldaý kórsetkenin aıta kele, ult sportyna janashyr biraqatar azamattarǵa, at sportyna erekshe ynta-yqylasyn tanytyp júrgen jas atbegilerge, báıgege shaýyp júrgen shabandozdarǵa alǵyshattar usyndy.

Eske sala keteıik, budan buryn «Jaıyq júırigi-2022» atty BQO ashyq chempıonaty máresine jetkenin jazǵan bolatynbyz.