Batys Qazaqstan oblysynda 443 myńǵa jýyq saılaýshy tirkelgen

ORAL. QazAqparat – Batys Qazaqstan oblysynda 20 qarasha kúni ótetin prezıdenttik saılaýǵa oraı 442 903 saılaýshy tirkelgen, dep habarlaıdy QazAqparat tilshisi.

BQO aýmaqtyq saılaý komıssııasynyń tóraǵasy Ǵaısa Qapaqovtyń málim etkenindeı, sonyń 229 641-i Oral qalasynyń úlesine tıedi.

Sondaı-aq Báıterek aýdanynda 39 286, Bórlide 38 874, Terektide 25 580, Aqjaıyqta 21 281 saılaýshy tizimge engizilgen.

Oblysta barlyǵy 505 saılaý ýchaskesi bolsa, sonyń 123-i Oral qalasynda ornalasqan. Barlyq ýchaskelerde saılaýǵa daıyndyq jumystary tolyqtaı júrgizildi.

Oral qalasy ákiminiń baspasóz qyzmetinen túsken málimetke qaraǵanda, 20 qarasha – saılaý kúni oblys ortalyǵy men shahar mańyndaǵy baǵyttar boıynsha avtobýstar tegin qatynaıdy.

«Qoǵamdyq kólikter kúndelikti kestege sáıkes júredi. Oǵan qosa sol kúni qala mańyndaǵy saıajaılardan saǵat 07.00-12.00 aralyǵynda saılaý ýchaskelerine deıin avtobýstar shyǵarylatyn bolady. Jalpy, 27 qalaishilik, 6 qala mańy jáne 10 saıajaı baǵyttary boıynsha kún saıyn 200-den astam avtobýs jolǵa shyǵady. Sonymen qatar saılaý kúni múmkindigi shekteýli jandar ınvataksıdiń qyzmetin paıdalana alady. Qala boıynsha 35 ınvataksı qyzmet etedi», dep habarlady qala ákimdiginen.

Eske sala keteıik, budan buryn Batys Qazaqstan oblysynda 2140 múgedektiń saılaýshylar tizimine engizilgenin jazǵan bolatynbyz.