Batys Qazaqstan oblysynda 40 jańa mektep salynady
BQO ákiminiń orynbasary Baqytjan Narymbetovtiń málim etkenindeı, Memleket basshysynyń tapsyrmasyna sáıkes óńirde «Jaıly mektep» ulttyq pılottyq jobasy aıasynda jobalyq qýaty 18 myń orynǵa (eki aýysymda 36 myń oqýshyǵa) eseptelgen 18 mektep boı kótermek.
Úsh aýysymdy jáne apatty jaǵdaıdaǵy mektepter máselesin sheshý maqsatynda 2023-2025 jyldar aralyǵynda Oral qalasynda - 10, Bórli, Báıterek, Jańaqala, Terekti aýdandarynda 8 bilim ordasy ǵımaratynyń qurylysy júrgiziledi.
B.Narymbetovtiń sózine qaraǵanda, budan bólek eldi mekenderde shaǵyn jınaqty 16 mektep salynady. Onyń 15-i «QPO b.v.» kompanııasynyń áleýmettik ınvesttsııalary, bireýi jergilikti bıýdjet qarjysy esebinen turǵyzylady. Qazirgi tańda Terekti aýdanynyń Poıma aýylynda, Qaratóbeniń Shalǵynynda osyndaı mektep qurylysy bastalyp ketti. Bul baǵytta atalǵan eki mektepke 108 jáne 60 orynǵa arnaıy jobalyq-smetalyq qujattama jasaldy, qalǵan 14 mekteptiń merdigerleri jaqyn arada anyqtalady.
«Sonymen qatar jergilikti qazyna esebinen 6 mektep boıynsha jumystar júrgizilýde. Bıyl Báıterek aýdanynyń Jambyl, Şapov, Oraldyń Melovye gorkı, Kaztalovtyń Saryqudyq aýyldarynda jańa mektepter esikterin aıqara ashty. Aldaǵy ýaqytta taǵy 2 mekteptiń qurylysy aıaqtalmaqshy. Osylaısha, Aq Jaıyq óńirinde 2022-2025 jyldary qarajat kózi naqty sheshilip otyrǵan 40 jańa mektep ashylady», dedi B.Narymbetov.
BQO bilim basqarmasynyń basshysy Aıgúl Myńbaevanyń aıtýynsha, oblysta 379 mektepte 118 334 oqýshy bilim alýda. Sol bilim nysandarynyń 198-i nemese 52,2 paıyzy 1980 jylǵa deıin salynǵan. Beıimdelgen ǵımarattarda 121 mektep ornalassa, onyń 48-i samannan salynǵan jáne apatty jaǵdaıǵa jaqyn tur.
Kúni búgin oblysta 11 apatty, 9 úsh aýysymdy mektep bar. 5 639 oqýshy orny jetispeıdi. Tek sońǵy 10 jylda oqýshylar kontıngenti 30 myńnan astam balaǵa ósti. Bul bilim ordalaryna úlken kúsh túsirip otyr.
«Jańadan salynatyn mektepterde oqýshylar men pedagogtar úshin barlyq jaǵdaı jasalatyn bolady. Bastaýysh jáne joǵary synaptar úshin bólek bloktar qarastyrylyp, jańa úlgidegi jıhazdar, ıaǵnı transformer partalar men pán kabınetteri, ámbebap akt zaly, qaýipsizdik sharalarymen tolyq qamtylady. Sportpen shuǵyldanýǵa, sabaqtan bos ýaqytta demalatyn jáne kitap oqýǵa, shyǵarmashylyqty damytýǵa arnalǵan zal-buryshtarmen jabdyqtalady. Pedagogtar úshin kabınetter, kásiptik oryndar, qosymsha oqýǵa nemese keńester ótkizýge arnalǵan zaldar, ár kabınette ınternetke bólek qosylǵan kompıýterler bolady. Jańa mektepterdi pedagogıkalyq kadrlarmen qamtýda tıisti jumystar júrgiziledi», dedi A.Myńbaeva.
Eske sala keteıik, budan buryn Batys Qazaqstanda jańa mektep paıdalanýǵa berilgenin jazǵan bolatynbyz.