Batys Qazaqstan oblysynda 3 mln sharshy metr baspana paıdalanýǵa berilmek

NUR-SULTAN. QazAqparat – Batys Qazaqstan oblysynda turǵyn úı salasynda 3 mln sharshy metr jańa baspanany paıdalanýǵa berý josparlanyp otyr. Bul týraly Úkimet otyrysynda Batys Qazaqstan oblysyn damytýdyń 2022-2025 jyldarǵa arnalǵan jańa keshendi josparyn talqylaý kezinde óńir ákimi Ǵalı Esqalıev málim etti, dep habarlaıdy QazAqparat tilshisi.

Onyń aıtýynsha, Batys Qazaqstan oblysynyń áleýmettik-ekonomıkalyq damýynyń keshendi jospary 116 is-sharany qamtıdy, olardy iske asyrý úshin shamamen 2,6 trln teńge qajet. Atalǵan qarajattyń 80%-ǵa jýyǵy jeke bıznes esebinen jáne memlekettik-jekeshelik áriptestik tetigi arqyly tartylady dep eskerilgen.

«Osyndaı aýqymdy ınvestıtsııalar kólemin tartý úshin óńirdi damytýdyń Keshendi josparynda kórsetilgen memlekettik qoldaý qajet. Tikeleı bıýdjettik ınvestıtsııalardan basqa, aımaq úshin mańyzdy máselelerge toqtalyp óteıin. Bul birinshiden aımaqty taýarlyq gazben qamtamasyz etý. Batys Qazaqstan oblysy Qazaqstanǵa taýarlyq gazdyń iri jetkizýshisi bolyp sanalǵanymen, bizdiń kóptegen áleýetti ınvestıtsııalyq jobalarymyz gazben jabdyqtaýǵa tehnıkalyq sharttardy alýdan bas tartqandyqtan iske asyryla bermeıdi. Sondaı-aq, mańyzdy máselelerdiń biri - elektr jelileri men avtomobıl joldaryn jóndeý. Bizdiń oblysymyzdaǵy elektr jelileri men avtomobıl joldary Qazaqstannyń basqa batys aımaqtarymen salystyrǵanda eń uzyn ekenin aıta ketkim keledi», - dedi Ǵ. Esqalıev.

Onyń sózine qaraǵanda, taǵy da mańyzdy máselelerdiń biri - Oral jáne Aqsaı qalalaryndaǵy jylýmen, sýmen jabdyqtaý jelileri, kárizdik tazartý qurylǵylaryn qaıta jańartý osy qalalardaǵy tirshilik etý obektileriniń jumysyn turaqtandyrýǵa múmkindik beredi.

«Turǵyn úı salasynda 3 mln sharshy metr jańa turǵyn úıdi paıdalanýǵa berý josparlanýda. Oblys aýdandarynda sýmen jabdyqtaý obektilerin salý jáne rekonstrýktsııalaý eskerilgen. Bul 2025 jyldyń sońyna qaraı aýyl halqynyń 100%-yn sýmen qamtamasyz etýge múmkindik beredi. Aýyl sharýashylyǵyn qoldaý kólemin ulǵaıtý óńirdiń etti mal sharýashylyǵyn damytýǵa jaǵdaı jasaıdy. Batys Qazaqstan oblysy qazirgi ýaqytta Qazaqstannyń birneshe óńirin sapaly etpen qamtamasyz etip otyr», - dedi oblys ákimi.

Sonymen qatar, áleýmettik salany damytý maqsatynda bir aýysymda 250 adam qabyldaıtyn emhana, kardıologııalyq ortalyq korpýsy, aýyldarda 42 modýldyq medıtsınalyq nysan, 74 jańa mektep, 150 oryndy múgedekterdi ońaltý ortalyǵy, 5 dene shynyqtyrý-saýyqtyrý kesheni qurylysy josparlanýda.

«Tutastaı alǵanda, Keshendi jospar 4 jyl ishinde jalpy óńirlik ónimniń 30%-ǵa ósýin, 38 myń jańa jumys orny qurylýyn jáne óńir turǵyndarynyń kóptegen áleýmettik-turmystyq problemalaryn sheshýdi qamtamasyz etedi dep qarastyryp otyrmyz. Sondaı-aq, bul halyq tabysynyń ósýine oń áser etip, aımaqtyń Qazaqstannyń damýyna qosatyn úlesin arttyrýǵa tıis», - dedi Ǵalı Esqalıev.

Budan buryn habarlanǵandaı , búgin Úkimet otyrysynda elimizdiń batys óńirlerin keshendi damytýdyń josparlary tanystyryldy.

Jalpy, keshendi josparlardy iske asyrý batys óńirler ekonomıkasynyń ósý qarqynyn ulǵaıtýǵa múmkindik beredi, jeke ınvestıtsııalar aǵynyna serpin beredi jáne halyqtyń ómir súrý sapasy men ál-aýqatyn arttyrýdy qamtamasyz etedi. 2025 jylǵa qaraı tórt óńir boıynsha shamamen 13 trln teńge jeke ınvestıtsııa tartý, 175 myńǵa jýyq jańa jumys ornyn qurý kózdelgen.