Batys Qazaqstan oblysynda 225 myń gektar jer memleketke qaıtaryldy
BQO jer qatynastary basqarmasynyń basshysy Murat Ómirálıevtiń aıtýynsha, Memleket basshysy bıylǵy 1 qyrkúıektegi Qazaqstan halqyna Joldaýynda ıgerilmeı jatqan jáne zańsyz tabystalǵan jer telimderine qatysty sharalar qabyldap, jyl sońyna deıin respýblıka boıynsha 5 mln ga jerdi qaıtarýdy tapsyrǵan bolatyn.
Qazirgi tańda jerlerdi paıdalanýdyń tıimdiligin arttyrý maqsatynda memleket tarapynan zańnamalardy jetildirý, aýyl sharýashylyǵy jerleriniń paıdalanylýyna baqylaýdy kúsheıtý, eldi meken jerlerin qajetti jaıylymdyq alqaptarmen qamtamasyz etý, jerlerdi sharýashylyq aınalymǵa tartý baǵytynda tıisti jumystar atqarylýda.
Oblys aýmaǵy 15 mln 133 myń gektar bolsa, sonyń 7756 myńy – aýyl sharýashylyǵy maqsatyndaǵy jerler, 2288 myńy – eldi mekenderge tıesili, 47 myńy – ónerkásip, kólik, baılanys, qorǵanys jáne aýyl sharýashylyǵyna arnalmaǵan ózge de jerler, 12 myńy – erekshe qorǵalatyn tabıǵı aýmaq, 217 myńy – orman qory, 82 myńy – sý qory, 3268 myńy – bosalqy jerler, basqasy – 1463 myń ga.
Basqarma basshysynyń sózine qaraǵanda, mal sanynyń ósýine baılanysty keıbir aýyldarda jaıylymdyq jerdiń jetispeýshiligi baıqalady. Osyny sheshý maqsatynda 249 514 ga jaıylymdyq jáne shabyndyq jer telimderi rezervke qoıyldy. 547,5 ga jer májbúrlep ıelikten shyǵaryldy. 4 356 gektar jer aýyldyq okrýg ákimderiniń apparattaryna turaqty paıdalanýǵa berildi. Sondaı-aq 27 569,6 gektar jaıylym eldi meken jerleri sanatyna aýystyryldy.
Jergilikti atqarýshy organdar tarapynan eldi mekenderdi 282 myń gektardy quraıtyn jaıylymdyq jáne shabyndyq alqaptarmen qamtamasyz etý múmkindigi bar.
M.Ómirálıevtiń málimdeýinshe, oblys boıynsha 2019-2021 jyldary paıdalanylmaı jatqan 1 mln 193 myń gektar jer telimi anyqtalsa, sonyń 225 myńy memleket menshigine qaıtaryldy. 739 myń gektar jer ıeleri maqsatyna saı ıgerýge kiristi, ıaǵnı 81 paıyzy boıynsha sharalar qabyldandy.
Sondaı-aq Batys Qazaqstan oblysynda «Tsıfrlyq Qazaqstan» memlekettik baǵdarlamasyn júzege asyrý aıasynda geoaqparattyq portal jumys jasaýda.
Jarııa kadastrlyq kartany toltyrý, geoaqparattyq qabattardy engizý, oblys boıynsha bas josparlar men egjeı-tegjeıli josparlaý jobalaryn tsıfrlandyrý boıynsha jumystar tolyq júrgizildi.
Ótinish berýshiler men memlekettik organdardyń qyzmetkerleri arasyndaǵy baılanysty tómendetý jáne sybaılas jemqorlyq táýekelderine jol bermeý maqsatynda Oral qalasy, Bórli jáne Báıterek aýdandarynyń ortalyqtary boıynsha barlyq múddeli uıymdarmen jer telimin tańdaý aktisin kelisýdiń avtomattandyrylǵan rásimi engizildi. Nátıjesinde qala jáne 2 aýdan ortalyǵy boıynsha elektrondy kelisim berý rásimine 24 mekeme qosyldy. Qazirgi tańda 1 474 jer ýchaskesin tańdaý aktisi elektrondy túrde kelisildi.
Tańdaý aktisin kelisýdi avtomattandyrý memlekettik organdardyń qyzmetkerlerimen baılanysty boldyrmaýǵa múmkindik berdi, sondaı-aq kelisý rásimin jedeldetti.
Qalǵan 10 aýdan ortalyǵynda (Aqjaıyq, Tasqala, Kaztalov, Jańaqala, Jánibek, Bókeı ordasy, Terekti, Syrym, Qaratóbe, Shyńǵyrlaý aýdandary) múddeli uıymdarmen jer telimin tańdaý aktisin kelisý rásimin avtomattandyrý boıynsha jumystar júrgizilýde.
Bıyl aýdandyq jergilikti atqarýshy organdarmen 36 konkýrs ótkizilip, 173 myń ga quraıtyn 276 jer telimi tabystaldy. Oǵan qosa 7 myń ga quraıtyn 16 jer telimin tabystaý boıynsha 3 konkýrs ótkizý josparlanyp otyr.
«Aýyl sharýashylyǵy maqsatyndaǵy jerlerdi ekonomıkalyq aınalymǵa konkýrstar arqyly engizý osy salanyń damýyna oń yqpalyn tıgizýde. Atap aıtqanda, 2022 jyly jańadan 134 agroqurylym ashylyp, ótken jyldyń 1 tamyzymen salystyrǵanda, iri qara sany 12, usaq mal 6, jylqy 12 paıyzǵa kóbeıdi. Sondaı-aq egis kólemi 3,3, sýarmaly jerler kólemi 11 paıyzǵa artyp otyr», dedi Murat Ómirálıev.
