Batys Qazaqstan oblysynda 2 aýdandyq aýrýhana jańartylmaq
BQO densaýlyq saqtaý basqarmasynyń basshysy Erlan Toqsanovtyń óńirlik kommýnıkatsııalar qyzmeti alańynda ótken brıfıngte málim etkenindeı, qazirgi tańda Kaztalov jáne Bórli aýdandyq aýrýhanasy negizinde 2 aýdanaralyq aýrýhana salý úshin jobalyq-smetalyq qujattama ázirleıtin uıym anyqtaldy. Erlan Vılenulynyń sózine qaraǵanda, 2025 jylǵa deıin Bórli (154 kereýet orynǵa eseptelgen) jáne Kaztalov (100 oryn) aýdandyq aýrýhanasy janynan ınsýlt ortalyǵy, teri arqyly aralasý ortalyǵy, travmatologııa bólimin ashý josparlanyp otyr. Bul jaǵdaıda Bórli aýdanaralyq aýrýhanasy kórshiles aýdandardyń turǵyndaryn qosqanda, 93 425, Kaztalov aýrýhanasy 56 586 adamǵa qyzmet kórsetetin bolady.
Eki aýdandyq aýrýhanany jańǵyrtý jumystarymen qatar jańadan mamandar alynady. Mysaly, Bórlige 29 maman qajet. Osyǵan baılanysty basqarma tarapynan Densaýlyq saqtaý mınıstrligine ótinim joldanady. Kaztalov aýdanaralyq aýrýhanasyn jańǵyrtý barysynda 33 dáriger, 58 orta býyn qyzmetkerler qajet. Eki aýdanǵa qajet mamandardy tartý úshin oblystyq máslıhat deńgeıinde turǵyn úı jáne 5 mln teńgege deıin áleýmettik paket bólý qarastyryldy.
Sonymen qatar, «Aýylda densaýlyq saqtaýdy jańǵyrtý» ulttyq jobasy aıasynda oblysta 2025 jylǵa deıin 50 alǵashqy medıtsınalyq-sanıtarlyq kómek nysany salynbaqshy. Sonyń ishinde bıyl – 24, 2024 jyly 26 nysan boı kótermekshi.
«Qazirgi tańda 50 nysanǵa arnalǵan jer telimderi rásimdeldi. Sondaı-aq, sáýlet-josparlaý tapsyrmasy men tehnıkalyq sharttardy alý jumystary júrgizilip jatyr. BQO qurylys basqarmasy bıylǵa josparlanǵan 24 medıtsınalyq nysannyń 14-i boıynsha jobalyq-smetalyq qujattar ázirlep, saraptamanyń oń qorytyndysy alyndy. Densaýlyq saqtaý mınıstrligine bıýdjettik ótinim joldanyp, 12 medıtsınalyq nysanda qurylys-montajdaý jumystaryn júrgizýge 3,6 mlrd teńge bólindi. Qazirgi kezde 12 nysan boıynsha qurylys-montajdaý jumystary bastaldy», - dedi E. Toqsanov.
Basqarma basshysynyń aıtýynsha, budan basqa «TurarHealthcare» kommertsııalyq emes aktsıonerlik qoǵamy 3 etalondyq joba daıyndap, saraptamanyń oń qorytyndysy alyndy. Atap aıtqanda, Aqjaıyq aýdany Bazartóbe aýylynda dárigerlik ambýlatorııa, Bórli aýdany Qaraǵandy aýylynda feldsherlik-akýsherlik pýnkt jáne Qaratóbe aýdany Úshaǵash aýylynda medıtsınalyq pýnkt turǵyzylady.
Qalǵan 7 medıtsınalyq nysannyń jobalyq-smetalyq qujattaryn jasaýǵa oblystyq bıýdjetten 902,0 myń teńge qaraldy.