Batys Qazaqstan oblysy elektr energııasyna táýeldilikten arylady - N.Noǵaev
ASTANA. QazAqparat - Bıyl Batys Qazaqstan oblysy elektr energııasyna táýeldilikten arylady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Batys Qazaqstan oblysynyń ákimi Nurlan Noǵaev málim etti.
«Naýryz-sáýir aılarynda Qarashyǵanaqtaǵy isten shyqqan trasformatordy jóndeý jumystary aıaqtalady. Sony iske qosyp, Qarashyǵanaqtan elektr energııasyn alatyn bolamyz. 100 Mvt-tyq birinshi kezeńi iske qosylǵan elektr stansasy da jumys isteı bastaıtyn bolady. Osylaısha, (óńirdiń) energetıkalyq táýelsizdigi qamtamasyz etiledi», - dedi N.Noǵaev.
Sonymen qatar óńir basshysy oblysqa qarasty aýyldarda jaryqtyń bolmaı qalatyndyǵyna qatysty da túsinik berdi. Onyń aıtýynsha, aýyldarǵa elektr energıııasynyń berilmeı qalýy tabıǵı sebepterge baılanysty.
«Kúni jyly bolyp turyp, aıaq astynan aıaz býady. Nemese aıazdy kúni aýa raıy kúrt jylynyp ketedi. Sonyń saldarynan barmaqtaı ǵana elektr symyn muz qursaýlaıdy da temir-beton baǵandar synyp jatady. Onyń aldyn alý qıyn. Bir amaly baǵandardyń arasyn jaqyndatý. Qazirgi ýaqytta salynyp jatqan baǵandar osy jaıt eskerilip ornatylýda», - dedi ákim.
