Batys Qazaqstan oblystyq gazetterine 100 jyl toldy
ORAL. QazAqparat - Búgin Batys Qazaqstan oblystyq «Oral óńiri» jáne «Prıýrale» gazetteriniń shyǵa bastaǵanyna týra bir ǵasyr toldy. Osyǵan oraı «Jaıyq Press» JShS-da saltanatty jıyn ótkizildi, dep habarlaıdy «QazAqparat» tilshisi.
Jıynda medıaholdıngtiń bas dırektory Jantas Safýllınniń atap ótkenindeı, oblystyq qos gazettiń 100 jyldyǵyna ázirlik barysynda kóptegen jumystar atqaryldy. Sonyń ishinde óńirdegi baspasóz tarıhy zerttelip, tyń derekter anyqtaldy. Buryn óńirlik gazetter 1918 jylǵy 17 qarashada Ordada jaryq kórgen «Habar-Izvestııa» gazetinen bastalyp keldi. Alaıda osy «Habardyń» alǵashqy nómirinde oblystyq kindik komıtettiń «Baspasóz taratý isi ilgerilep, jemisti hám paıdaly bolýy úshin Astrahannan kelgen jańa baspahana men Han ordasyndaǵy «Uran» baspahanasy biriktirilip, ol baspahanany basqarý isi joldas Vygdorşıkke tapsyrylsyn» degen №12 hattamasy jarııalanýy «Uran» gazetin izdestirýge túrtki boldy. «Uran» gazetiniń toǵyz nómiriniń túpnusqasyn Almaty qalasyndaǵy «Respýblıkalyq kitap murajaıy» RMQK-dan belgili ǵalym, jýrnalıst Maqsat Tájimurat taýyp berdi. Tigindiniń betine bylaı dep jazylypty: «Halyq aqyny Nadralıev Andashtyń (1889-1954 j. j.) jeke qorynan. Burynǵy Astrahan oblysy Bókeı ordasy, qazirgi Jańaqala
aýdany Jańaqazan aýylynda dúnıege kelgen».
Mýzeı qyzmetkeriniń aıtýy boıynsha, gazet tigindisi 1978 jyly tapsyrylǵan. «Uran» gazetiniń keı nómirleriniń kóshirmeleri Batys Qazaqstan oblystyq ólketaný mýzeıinde zertteýshi, ǵalym Mustafa Ysmaǵulov jınaǵan qordyń ishinde de saqtalǵan eken. Ol «Uran» gazetiniń fotokóshirmelerimen qatar osy gazettiń bas redaktory ári uıymdastyrýshysy Ǵabdolǵazız Musaǵalıevtiń kóptegen eńbegin jınaqtap qoıypty. Qolda bar gazet kóshirmelerinen belgili bolǵanyndaı, «Urannyń» keminde 38 nómiri jaryq kórgen. Ázirge toǵyz nómiri tabyldy. Osylaısha, oblystyq qos gazettiń izashary «Urannyń» 1917 jyly 28 shildede Ordada alǵashqy sany shyqqany belgili boldy. 2014 jyly bar tapqan nómirler kırıllıtsaǵa aýdarylyp, Mustafa Ysmaǵulov jınaǵan eńbekter, «Uran» gazetiniń bas redaktory bolǵan Ǵabdolǵazız Musaǵalıevtiń basqa da basylymdarda jaryq kórgen maqa¬lalary jáne «Uran» týraly jazylǵan materıaldar toptastyrylyp, «Uran» gazeti 1917-1918» kitaby shyǵaryldy
«Qazaqstan» gazetiniń redaktory bolǵan Eleýsin Buırınmen qatar Zashaǵan kentindegi taǵy bir kóshege Ǵabdolǵazız Musaǵalıevtiń esimi berilip, sýreti men ómirbaıany jazylǵan bılbord ornatyldy. «Qazaqstan» men «Uran» óz aldyna, «Izvestııa-Habar», «Kırgızskaıa pravda» - «Qazaq durystyǵy», «Durystyq joly», «Ushqyn» (respýblıkalyq «Egemen Qazaqstan» gazetiniń bastaýy) gazetteri de jınaqtalyp, jeke kitap bolyp jaryq kórdi. Oǵan qosa el táýelsizdiginiń 25 jyldyǵyna oraı 1991 jylǵy 16 jeltoqsannan bastap 2016 jylǵa deıingi, ıaǵnı shırek ǵasyrdy qamtıtyn óńirdiń hronologııalyq shejiresi de jasalyp, eki tilde basylyp shyqty. 
Qoryta aıtqanda, sońǵy bes jyl ishinde oblystaǵy baspasóz tarıhyna baılanysty on kitap jaryq kórdi. Oǵan qosa gazetterdiń 100 jyldyq tigindileri jınaqtalyp, elektrondy nusqalary jasaldy. Qazirgi kezde arnaıy bólme jasaqtalyp, júz jyldyq tigindi qoıyldy. Bul Qazaqstan Prezıdentiniń «Tsıfrly Qazaqstan» jobasymen tolyq úndesedi. Qos gazettiń ǵasyrlyq mereıtoıyna oraı basqa da jumystar jalǵasyn tabýda. Bıyl Baılanys jáne aqparat qyzmetkerleriniń kúnine oraı oblystyq «Prıýrale» gazeti redaktsııasy ujymynyń Elbasynyń Alǵysyna ıe bolýy jýrnalıster eńbegi baǵalanǵanynyń bir kórinisi edi.
Shara barysynda merekege daıyndyqqa súbeli úlesterin qosqan oblystyq «Oral óńiri» jáne «Prıýrale» gazetteriniń bas redaktorlary Baýyrjan Ǵubaıdýllın men Roza Syıqova, baspasóz tarıhyn zertteý jónindegi maman Qazybek Qabjanovqa jáne ardagerlerge alǵys aıtylyp, qurmet kórsetildi.
Aıta keteıik, oblystyq «Oral óńiri» jáne «Prıýrale» gazetteriniń 100 jyldyǵyna arnalǵan negizgi sharalar aldaǵy qyrkúıek aıynda ótedi.
