Batys Qazaqstan men Almaty qalasynda sportshylardyń oqý-jattyǵýyna bólingen qarjyny jymqyrǵan basshylar qamaýǵa alyndy
ASTANA. 4 maýsym. QazAqparat - Aǵymdaǵy jylǵy 27 sáýirde Batys Qazaqstan oblysy boıynsha Qarjy polıtsııasy departamentiniń qyzmetkerleri oblystyq Týrızm jáne sport basqarmasynyń bastyǵy M.Ondaǵanovty qamaýǵa aldy.
Ol «Aqjaıyq» hokkeı klýby músheleriniń issaparyna bólingen 17 mln.teńgeden astam bıýdjet qarajatyn urlady dep aıyptalýda. Bul týraly QR Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen málim etti.
«2013 jylǵy 13 mamyrda Ondaǵanovqa qatysty qylmystyq ister Ulttyq qaýipsizdik komıtetiniń tergeýshisi basqaratyn vedomstvoaralyq tergeý tobyna odan ári tergeý úshin tapsyryldy», - delingen taratylǵan baspasóz aıǵaǵynda.
Sondaı-aq Almaty qalasynyń Qarjy polıtsııasy departamenti «Almaty» áıelder voleıbol komandasynyń dırektory S.Nurpeısovaǵa qatysty komandanyń 2009-2010 jyldary oqý-jattyǵý jıyndaryn ótkizýge bólingen 10 mln. teńgeden astam bıýdjet qarajatyn urlaý faktisi boıynsha qylmystyq is qozǵady.
Sot qaraýy barysynda Nurpeısova aıybyn túgel moıyndap, keltirilgen zalaldy tolyq mólsherde ótedi. Ol shartty túrde 3 jylǵa bas bostandyǵynan aıyrýǵa sottaldy.
Oǵan qosa, Almaty qalalyq Qarjy polıtsııasy departamenti Almaty qalasynyń velosıped sportyn damytý boıynsha sporttyq klýbtyń dırektory V.Osıpovqa qatysty qylmystyq isti tergeýde. Ol qyzmettik jalǵandyq jasaý arqyly Qyrǵyzstan Respýblıkasyndaǵy Sholpan-Ata qalasynda 12 sportshy men 2 trenerdiń oqý-jattyǵý jıyndaryn ótkizýge bólingen 1,5 mln. teńgeden astam aqshany urlady dep kúdiktelýde.
