Batys Qazaqstan medýnıversıtetinde birqatar zańbuzýshylyqtar anyqtaldy - DSM

AQTÓBE. QazAqparat - Densaýlyq saqtaý mınıstrliginiń aýdıtorlyq tekserýi Marat Ospanov atyndaǵy Batys Qazaqstan medıtsına ýnıversıtetindegi birqatar kemshilikterdi anyqtady. Bul jóninde mınıstrliktiń baspasóz qyzmetine silteme jasap QazAqparat habarlaıdy.

QR Densaýlyq saqtaý mınıstrligi jospardan tys aýdıtorlyq tekserý qorytyndysyn quqyq qorǵaý organdaryna jiberdi.

«11 qazanda QR Densaýlyq saqtaý mınıstrliginde jaýapty hatshy Botagóz Jakselekovanyń tóraǵalyǵymen memlekettik aýdıt jáne táýekelder jónindegi keńestiń otyrysy ótti. Jıynda Marat Ospanov atyndaǵy Batys Qazaqstan medıtsına ýnıversıtetinde júrgizilgen jospardan tys memlekettik aýdıtorlyq tekserý qorytyndysy qaraldy. Anyqtalǵan kemshilikter az emes, atap aıtqanda, ýnıversıtettegi materıaldyq taýarlar negizsiz esepten shyǵarylǵan, azamattyq-quqyqtyq mámile sharttaryna sáıkes kelmeıtin taýarlar, jumystar men qyzmetter bar. «Jastar-Arena» stadıonyna júrgizilgen qurylystyń sapasy tómen jáne eńbek zańnamasy buzylǵan» delingen habarlamada.

Keńeste atalmysh medýnıversıtetten tekserý barysynda tabylǵan barlyq materıaldy quqyq qorǵaý organdaryna jiberý týraly sheshim qabyldandy.

Aıta ketý kerek, ótken jyly 15 tamyzda Densaýlyq saqtaý mınıstrligi men Memlekettik qyzmet isteri jáne sybaılas jemqorlyqqa qarsy is-qımyl agenttigi yntymaqtastyq týraly memorandýmǵa qol qoıǵan. Onda sybaılas jemqorlyq boıynsha kúdik bolǵan kezde jedel den qoıý jáne materıaldardy sybaılas jemqorlyqqa qarsy is-qımyl organdaryna jiberý qarastyrylǵan.