«Batys Qazaqstan elektr jelilerin taratý kompanııasy» AQ men onyń basshysyna 7,8 mln. astam teńge aıyppul salyndy

ORAL. QazAqparat - BQO prokýratýrasy «Batys Qazaqstan elektr jelilerin taratý kompanııasy» AQ-da «Tabıǵı monopolııalar jáne retteletin naryqtar týraly», «Memlekettik satyp alýlar týraly», «Elektr energetıkasy týraly» Zańdardyń jáne Eńbek kodeksiniń 2014-2015 jáne 2016 jyldyń basynan bergi kezeńindegi saqtalýyna tekserý júrgizgen kezde kóptegen zańbuzýshylyqtardyń beti ashyldy, dep habarlaıdy «QazAqparat» HAA tilshisi.

BQO prokýratýrasynyń baspasóz qyzmetinen túsken málimetke qaraǵanda, mysaly, tehnıkalyq sharttardy berý jónindegi ótinish úsh jumys kúni ishinde qaralýy tıis bolsa da, ol segiz aıǵa deıin sozylǵan. Sol sekildi kelisimsharttarǵa negizsiz talaptar engizilgen. Sondaı-aq tutynýshylarǵa elektr qýatyn bergeni úshin tólemaqynyń 90 paıyzyn aldyn ala tóleý mindettelgen. Elektr jabdyqtaryn talapqa saı ustaý baǵytynda tıisti sharalar alynbaǵan, eńbek demalystary berilgen kezde qarjy ýaqtyly tólenbegen, basqa da zańbuzýshylyqtar oryn alǵan.

Prokýrorlyq qadaǵalaý aktisin qaraý nátıjesinde «Batys Qazaqstan elektr jelilerin taratý kompanııasy» AQ men onyń basshysyna 7 mln. 825,493 myń teńge kóleminde aıyppul salynyp, ol tolyq óndirildi. Oǵan qosa kompanııanyń 27 laýazymdy qyzmetkeri tártiptik jaýapkershilikke tartyldy.