Batys Eýropadaǵy eń bıik taý bir metrge tómendedi
PARIJ. QazAqparat – Batys Eýropadaǵy eń bıik taý Monblan tórt jyl ishinde bir metrge tómendedi, dep habarlaıdy QazAqparat France Bleu radıostantsııasyna silteme jasap.
Radıostantsııa keltirgen geodezısterdiń baıandamasyna sáıkes, qazirgi ýaqytta taýdyń bıiktigi 4 807,81 metrdi quraıdy, al 2017 jyly Monblannyń bıiktigi 4 808,72 m bolǵan. «Batys Eýropanyń tóbesi osylaısha 4 jyl ishinde bir metrge tómendedi», - dep atap ótken radıostantsııa.
France Bleu naqtylaǵandaı, geodezııalyq ekspedıtsııa 16-18 qyrkúıek aralyǵynda ótken. Mamandar taýdyń bıiktiginiń ózgerýi onyń joǵary jaǵyndaǵy qar jamylǵysynyń azaıýyna baılanysty dep túsindiredi.