«Batys Eýropa-Batys Qytaı» jobasyn júzege asyrý merziminde esh aýytqýlar joq - Á. Qusaıynov
ASTANA. Maýsymnyń 15-i. QazAqparat /Qanat Mámetqazyuly/ -«Batys Eýropa-Batys Qytaı» jobasyn júzege asyrý merziminde eshqandaı da aýytqýshylyq joq, qaıta keıbir baǵyttarda merziminen buryn atqarýlar oryn alyp otyr. Búgin jýrnalısterge arnap ótkizilgen baspasóz máslıhatynda BAQ suraqtaryna jaýap bergen QR Kólik jáne kommýnıkatsııa mınıstri Ábilǵazy Qusaıynov osylaı málim etti,
dep habarlaıdy QazAqparat.
«Men osy jobaǵa atsalysyp otyrǵan barlyq merdigerlerge alǵysymdy bildirýim kerek. Shyndyǵynda, osy jobaǵa aralasqysy kelgender kóp bolatyn. Sondyqtan, olardy irikteýde de qatańdyqtar bolatynyn eskertken edik. Jalpy, jobanyń júzege asýyna keletin bolsaq, biz birqatar ýchaskelerdegi jospardy kesteden ozyp, merziminen buryn oryndap jatyrmyz», dedi mınıstr.
Onyń aıtýynsha, aǵymdaǵy jyly kúzge deıin joba aıasyndaǵy 378 shaqyrymdy qoldanysqa berý kózdelgen. «Bul mindetti jeńil oryndap kelemiz. Aldyn ala boljamasaq ta, kórsetkishte oń nátıjege jetemiz degen úmittemiz. Taǵy bir aıta keterligi, jobaǵa qatysqandar jumysqa úlken yntalylyqpen kirisip otyr. Olardyń jumys jaǵdaıy da jaqsy qarastyrylǵan. Sondyqtan, jobany júzege asyrý merziminen aýytqýlar ázirshe joq», dedi Á. Qusaıynov.
