«Batys Eýropa - Batys Qytaı» jobasyn iske asyrý máseleleri boıynsha selektorlyq jıyn ótti
TANA. 15 tamyz. QazAqparat - 12 tamyzda QR Kólik jáne kommýnıkatsııa mınıstri Berik Kamalıev respýblıkalyq bıýdjet esebinen qarjylandyrylǵan elimizdegi avtojol nysandaryn salý, qaıta salý jáne jóndeý josparlaryn oryndaý barysy,
sondaı-aq «Batys Eýropa - Batys Qytaı» jobasyn iske asyrý máseleleri boıynsha selektorlyq jınalys ótkizdi, dep habarlady vedomstvonyń baspasóz qyzmetinen.
Jınalysqa avtomobıl joldary komıteti jáne onyń oblystyq departamentteri, «Qazaqavtojol» RMK, elimizdiń barlyq óńirlerindegi merdigerlik kompanııalarynyń basshylary qatysty.
Mınıstr Berik Kamalıev jumys óndirý kestesin oryndaýǵa baqylaý ornatýmen qatar jalaqyny ýaqtyly tóleý, eńbek sharttary men qyzmetkerlerdiń turmys jaǵdaılaryn oryndaý máselelerine basty nazar aýdarý qajettigin atap ótti
Májilis barysynda B.Kamalıev qatysýshylardyń nazaryn basty problemalyq máselelerge aýdardy. Qyzylorda oblysynda «Salını», «Akkord/Okan», «Impreza» jáne «Azerkopý» kompanııalary jumys óndirý kestesinen qalyp qoıýda. Onyń sebepteri tehnıkanyń, qyzmetkerlerdiń, materıaldar men janar-jaǵarmaıdyń jetispeýi sııaqty kóptegen sheshilmegen máselelerge baılanysty bolyp otyr. Sondaı-aq, osy oblystyń ýchaskelerindegi jumystardyń jaı-kúıi men jumys kestesinen qalyp qoıýshylyqty boldyrmaý maqsatynda taıaý ýaqytta arnaıy jınalys ótkizý qajettigin atap ótti. Ońtústik Qazaqstan oblysynda «Kýkdong» kompanııasy jumys júrgizý kestesinen qalyp qoıýda. Osyǵan baılanysty kólik vedomstvosynyń basshysy avtomobıl joldary komıtetine taıaý kúnderi Pavlodar munaı óńdeý zaýytynyń basshylyǵymen merdigerlik uıymdardyń onymen aldyn ala jasaǵan sharttaryna sáıkes kólemde bıtýmdy ýaqtyly jetkizý máselelerin sheshýdi tapsyrdy. Bunyń syrtynda, avtomobıl joldary komıtetiniń oblystyq departament dırektorlarynyń bir tobyna Qyzylorda jáne Ońtústik Qazaqstan oblystaryna baryp, qalyp qoıǵan ýchaskelerge tájirıbelik jáne uıymdastyrý jaǵynan kómek kórsetý, sonymen birge respýblıkanyń basqa óńirlerinen qajetti tehnıka jumyldyryp, jetkizýdi tapsyrdy.
Selektorlyq jınalysty qorytyndylaı kele, mınıstr áriptesterin kele jatqan Qurylysshylar kúnimen quttyqtady.
