«Batys Eýropa-Batys Qytaı» tasjolynda avtomattandyrylǵan mobıldi keshen iske qosyldy
Jambyl oblysy aýmaǵynda «Batys Eýropa-Batys Qytaı» respýblıkalyq mańyzy bar tas jolynda «Arqan» avtomattandyrylǵan mobıldi keshenin tanystyrý sharasy ótkizildi. Atalǵan is-sharaǵa Jambyl oblysy Polıtsııa departamentiniń basshysy jáne jeke quramy, sondaı-aq buqaralyq aqparat quraldarynyń ókilderi qatysty.
Shara barysynda Polıtsııa departamentiniń bastyǵy, polıtsııa polkovnıgi Arman Orazalıev keshenniń mańyzdylyǵy týraly túsindirip ótti.
«Óńirimizde jol-kólik oqıǵalarynyń aldyn alý boıynsha bizdiń departament birqatar is-sharalardy atqarýda. Osy oraıda oblys ákiminiń qoldaýymen Respýblıkalyq mańyzy bar avtojoldarda qyzmet kórsetetin patrýldik polıtsııa kólikterine on birlik «Arqan» mobıldi keshenin ornatyp, qoldanysqa berip otyrmyz. Mobıldi keshen oblystyń jol-kólik oqıǵasy kóp oryn alatyn aýmaqtarynda qyzmet kórsetetin bolady. Sondaı-aq, avtomattandyrylǵan rejımde polıtsııa qyzmetkerleriniń qatysýynsyz baqylaý júrgizedi. Aıta keterlik jaıt, atalǵan qurylǵy respýblıka boıynsha bizdiń oblysta alǵash ret qoldanysqa engizilýde. Keshendi qoldanysqa engizý arqyly biz joldaǵy apat deńgeıin tómendetýge qol jetkizemiz degen oıdamyz», - degen departament basshysy qurylǵynyń múmkindikterin jan-jaqty tanystyryp ótti.
Aıta keteıik, «Arqan» mobıldi kesheni joldyń baqylanatyn aımaǵy arqyly ótetin barlyq kólikterdiń nómirlik belgilerin, túsi men markasyn tanýǵa, belgilengen jyldamdyqty arttyrý derekterin tirkeýge qabiletti. Bul qurylǵynyń kómegimen aıyppul týraly aqparattar derekterdi óńdeý ortalyǵyna jáne Bas prokýratýranyń ákimshilik óndiristeriniń biryńǵaı tizilimine avtomatty túrde jiberiletin bolady. Sonymen qatar, polıtsııa qyzmetkeriniń júrgizýshimen qarym-qatynasyn boldyrmaı, sybaılas jemqorlyqtyń jolyn kesýge múmkindik bermek.
Budan bólek, kólik quralynyń tanylǵan nómirlik belgisi boıynsha polıtsııanyń izdestirýinde nemese júrgizýshiniń buryn jasaǵan ákimshilik quqyq buzýshylyq úshin boryshkerler tiziminde bolýy avtomatty túrde tekseriledi. Bul jaǵdaıda mobıldi keshendegi polıtsııa ınspektory zańǵa sáıkes quqyq buzýshyǵa qatysty jedel áreket etý sharalaryn qabyldaı alady.
«Arqan» mobıldi kesheni aǵymdaǵy jyldyń 20 jeltoqsanynan bastap bir aı kóleminde testtik rejımde jumys isteıtin bolady. Kórsetilgen merzimde jol-kólik oqıǵalarynyń deregi tómendep, oń nátıjege qol jetkizgen jaǵdaıda mobıldi qurylǵynyń sanyn arttyrý josparlanýda»,-delingen oblystyq polıtsııa departamenti baspasóz qyzmetiniń habarlamasynda.
