«Batys Eýropa - Batys Qytaı» kólik dáliziniń Ońtústik Qazaqstanǵa qarasty aýmaǵynda jumys keste boıynsha júrip jatyr
KENT. 27 maýsym. QazAqparat /Tatıana Pylaeva/ - «Batys Eýropa - Batys Qytaı» kólik dáliziniń Ońtústik Qazaqstanǵa qarasty aýmaǵynda jumys keste boıynsha júrip jatyr. Aımaqqa jumys saparyn jasaǵan QR Kólik jáne kommýnıkatsııa mınıstri Berik Kamalıev buǵan kóz jetkizdi.
Mınıstr iri eldi mekenderdi aınalyp ótetin aınalma joldar salynyp jatqan eń qıyn jol ýchaskelerinde boldy. «Memleket basshysynyń tapsyrmasy boıynsha, «Batys Eýropa-Batys Qytaı» mega-jobasy júzege asyrylyp jatyr. Dálizdiń Ońtústik Qazaqstan oblysyndaǵy uzyndyǵy 448 shaqyrym. Qazir bizdiń jol-qurylys kompanııalary 224 shaqyrym uzyndyqtaǵy jolda jumys isteýde», - dedi mınıstr.
Merdigerlik kompanııa jetekshilerimen bolǵan áńgimede mınıstr jumysqa jergilikti halyqty qabyldaý jáne tek qana jergilikti qurylys materıaldaryn paıdalaný vedomstvonyń qatań baqylaýynda ekenin atap ótti.
Jol salynatyn aýmaqtardaǵy jer ýchaskelerin satyp alý máselesi de sheshildi deýge bolady. «Qurylys júrip jatqan ýchaskelerde satylyp alynbaǵan 166 ýchastok bar, bul 26 maýsymdaǵy málimetter. Baǵalaý jumystary júrip jatyr. Aldaǵy kúnderi, bir aı ishinde biz bul máseleni aıaǵyna jetkizemiz dep oılaımyn», - dep atap ótti mınıstr.
