«Batys Eýropa - Batys Qytaı» halyqaralyq dáliziniń bir bóligi aqyly bolady
ASTANA. Qazannyń 5-i. QazAqparat /Jasulan Amanbaıuly/ - «Batys Eýropa - Batys Qytaı» halyqaralyq dáliziniń Qorǵas - Almaty jáne Shymkentten Ózbekstan shekarasyna deıingi jol bólikteri kólik qozǵalysy úshin aqyly bolady.
Bul týraly búgin baspasóz máslıhatynda Kólik jáne kommýnıkatsııa mınıstrligi Avtomobıl joldary komıteti tóraǵasynyń orynbasary Nurlan Ómirbaev aıtty.
«Sebebi joldyń bul bólikteri jeke ınvestorlardyń qarjysyna salynyp jatyr. Eki-úsh jyl qurylysqa shyǵyndaǵan qarjyny olar 20 jyl ýaqyt aralyǵynda jol quny aqtalǵansha alyp otyrady», deıdi ol.
Almaty-Qorǵas jolynyń jalpy uzyndyǵy 301 shaqyrym. Tashkent-Shymkent-Jambyl oblystarynyń shekaralary aýmaǵyndaǵy kontsessııalyq, ıaǵnı aqyly jol bóligi 209 shaqyrym. Mamandardyń pikirinshe, bul joldyń tranzıttik áleýeti zor. Qytaıdan Batys Eýropaǵa bettegen júk kerýeni mol. Sondyqtan bul jolǵa ınvestor da tabylady, ári ınvestordyń salǵan qarjysy da tez arada qaıtady.
«Batys Eýropa - Batys Qytaı» jobasynyń Reseı aýmaǵyndaǵy bóliginde de aqyly jol ýchaskeleri bolady. Máselen, Sankt-Peterbor men Máskeý aralyǵy, sonymen qatar Tatarstan aýmaǵymen ótetin joldar da jeke ınvestorlardyń menshigi.
Ázirge bulardyń naqty aqysy men tólem júıesiniń qandaı bolatyny anyqtalmaǵan.
Soltústikte aqyrǵy núktesi Sankt-Peterbýrgte, ońtústikte sońǵy aıaldamasy Qytaıdyń Lıanıýngan aılaǵynda aıaqtalatyn 8 445 shaqyrymdyq «Batys Eýropa - Batys Qytaı» transqurlyqtyq kólik dáliziniń 2 787 shaqyrymy elimizdiń 5 oblysy aýmaǵymen ótedi.
Jobanyń Qazaqstandaǵy bóligi 2013 jyly aıaqtalýy tıis. Qytaıdaǵy qurylys 2011-2012 jyldary paıdalanýǵa berilmek.
