«Batys Eýropa-Batys Qytaı» dáliziniń qazaqstandyq bóligin basyp ótken avtosherý elordaǵa keldi
ASTANA. Qazannyń 5-i. QazAqparat /Jasulan Amanbaıuly/ - «Batys Eýropa-Batys Qytaı» halyqaralyq kólik dáliziniń qazaqstandyq bóligindegi jolyn kókteı ótken avtosherý saparlaryn Astanada támamdady.
«Avtosherý 7 kúnge sozyldy. Qorǵas beketinen bastalǵan shara Almaty, Taraz, Shymkent, Túrkistan, Qyzylorda jáne Jezqazǵan arqyly ótip, Astanaǵa keldi. Negizgi maqsat - halyqaralyq dálizdiń qurylysyna sholý jasaý. Sebebi, bul teńdessiz joba. Biz kúre jol boıyndaǵy turǵyndarǵa, ásirese jastarǵa kólik dálizi paıdalanýǵa berilgennen keıin olardyń adynda logıstıkalyq jáne kásipkerlik turǵysynda qandaı múmkindikter ashylatyndyǵy jóninde aıtýǵa tyrystyq», deıdi AllurAuto avtokólik kompanııasy toby jáne «Jasyl el» ekologııalyq jastar qozǵalysynyń birlese jasaǵan sherý jaıynda avtokólik kompanııasynyń bas dırektory Andreı Lavrentev.
Ekıpaj júrip ótken joldyń jalpy uzyndyǵy - 3 myń shaqyrym. Joryqqa qatysýshylar Qostanaı qalasynda jasalǵan qazaqstandyq «Ssang Yong» jańa avtokólikterin minip shyqqan.
Osylaısha otandyq avtobıznes ókilderi jergilikti jurtty halyqaralyq kúre jol boıynda qazirgi zamanǵy kólik-servıs ınfraqurylymyn qurý ıdeıasyna tartýdy jáne qazaqstandyq avtokólikterdi alǵashqy synaqtan ótkizýdi kózdegen.
«Bul jol baǵzy zamandarda Qazaqstan jerinde bolǵan Jibek jolynyń súrleýi jáne biz qazirgi tańda elimizdiń sol kezdegi logıstıkalyq áleýetin qaıta jandandyrýǵa talpynyp jatyrmyz», dep atap kórsetti A. Lavrentev.
Oǵan SsangYong markaly 5 kólik qatystyryldy. Jol tańdamaı júretin kólik júrgizýshileriniń sózine qaraǵanda, sherý barysynda bul avtokólikterden esh aqaý, min tabylǵan joq.
«Jasyl el» qozǵalysynyń belsendilerinen, «Allıýr avto» kompanııasynyń basshylyǵynan, jýrnalsıterden quralǵan ekıpaj músheleri avtosherý barysynda balalar ınternattarynyń tárbıelenýshilerimen, JOO-nyń stýdentterimen jáne jol boıynda ornalasqan eldi meken turǵyndarymen kezdesti.
«Meniń pikirimshe, bıznes retinde biz áleýmettik jaýapkershilik aıasynda durys patrıottyq qadam jasadyq. Ekinshiden, biz qazaqstandyq avtokólik óndirisiniń sapasyn tekserdik», dep túıindedi sózin «Allıýr avto» kompanııasynyń bas dırektory.
