«Batys Eýropa-Batys Qytaı» dálizi jobasyna 35 myńnan astam jumysshy tartylyp otyr
ASTANA. 31 qazan. QazAqparat - «Batys Eýropa-Batys Qytaı» dálizi jobasyna 35 myńnan astam jumysshy tartylyp otyr. Búgin Parlament Senatynyń jalpy otyrysynda «Qazaqstan Respýblıkasy men Azııa Damý Banki arasyndaǵy Qaryz týraly kelisimdi ratıfıkatsııalaý týraly» Zańyn talqylaý barysynda Kólik jáne kommýnıkatsııa mınıstri Asqar Jumaǵalıev osylaı málim etti. Eske sala keteıik, atalǵan kelisim Azııa Damý Bankiniń Qazaqstanǵa «Batys Eýropa-Batys Qytaı» dálizi sheńberinde «Shymkent-Tashkent» jol ýchaskesin damytý úshin qaryz berýdi kózdeıdi.
Mınıstrdiń aıtýynsha, 2009 jyldan bastap «Batys Eýropa-Batys Qytaı» halyqaralyq tranzıttik dáliz jobasy iske asyrylyp keledi. Bul rette Qazaqstan Respýblıkasy boıynsha dálizdiń jalpy uzaqtyǵy 2787 shaqyrymdy qurap, 2452 shaqyrym jol qaıta jańartylady. Atalǵan jobany iske asyrý úshin halyqaralyq qarjy ınstıtýttary tartylǵan bolatyn. Atap aıtqanda, halyqaralyq Eýropa, Islam jáne Azııa damý bankteri men Japon halyqaralyq agenttigi tarapynan qarjy salynyp, 2009 jyldan bastap jalpy somasy 4 mlrd. 673 mln. dollaryn quraıtyn 11 kelisim qabyldanǵan.
«Joba aıasynda 2011 jyly Aqtóbe oblysynda 215 shaqyrym jol paıdalanýǵa berildi. 2012 jyly Jambyl jáne Qyzylorda oblystarynan 700 shaqyrymdy quraıtyn jol qozǵalystary ashyldy. Qazirgi ýaqytta dálizdiń 1 myń 854 shaqyrymynda jumystar jalǵasyp jatyr. Onyń ishinde aǵymdaǵy jyly 449 shaqyrymda jóndeý jumystary bastaldy. 2013 jyldyń sońyna deıin Jambyl, Ońtústik Qazaqstan, Qyzylorda jáne Aqtóbe oblystarynda 806 shaqyrym joldy paıdalanýǵa berý josparlanyp otyr. Qazirgi tańda jobaǵa 35 myńnan astam jumysshy tartylyp, 4,5 myń tehnıka, 33 asfalt-beton, 31 tsement-beton zaýyttary jumyldyrylǵan. Qurylys jumystary josparǵa saı júrgizilýde», - deıdi A. Jumaǵalıev. Onyń aıtýynsha, jalpy jol qurylystarynyń jumysyn 2015 jyly aıaqtaý josparlanyp otyr.
