«Batys Eýropa - Batys Qytaı» dálizi boıynda jer telimderi máselesi sheshilmeı otyr
ASTANA. 24 mamyr. QazAqparat /Arman Asqarov/ - «Batys Eýropa - Batys Qytaı» dálizi boıynda jer telimderi máselesi sheshilmeı otyr. Búgin osy jobany baqylap otyrǵan «Nur Otan» partııasynyń sarapshylar toby osy problemany kóterdi.
Jalpy, «Batys Eýropa - Batys Qytaı» jobasy boıynsha Ońtústik Qazaqstanda 847 jer telimi satyp alynýy tıis bolǵan. Ótken jyldary osy jerlerdiń 299-y memleket menshigine ótken. Aǵymdaǵy jyldyń sońǵy tórt aıynda taǵy 137 jer telimi satyp alyndy. Al 63 telimge qatysty jer qunyn anyqtaıtyn akt qujattary daıyndalyp otyr. Alaıda bar másele - jer ıeleriniń memleket qoıyp otyrǵan jer baǵasymen kelispeı otyrǵandyǵynda. Máselen, 35 jer teliminiń qojaıyny memleket tarapynan bólingen qarajatpen kelispeı, sotqa shaǵymdanýda. 1 mln. teńgege baǵalanǵan jer telimderi 10-15 mln. teńgege bank kepildigine ótip ketken jaǵdaılar kezdesedi. Kásipkerler osy sátti utymdy paıdalanyp, memleketke qajetti jerdi eselep, qymbatqa satýǵa dándep alǵan kórinedi. Máselen, Saıram aýdanynyń ákimi 86 gektar jerdi 360 myń teńgege alyp, memleketke 17 mln. 500 myń teńgege satyp úlgergen. Osynyń bári búginde jol qurylysyna edáýir kedergi bolýda.
