«Batys Eýropa - Batys Qytaı» avtojolynyń «Samara-Shymkent» ýchaskesindegi aqaýlardy merdiger óz esebinen joıatyn bolady

ASTANA. QazAqparat - «Batys Eýropa - Batys Qytaı» avtojolynyń «Samara-Shymkent» ýchaskesiniń Tórtkól kenti men Túrkistan qalasy aralyǵyndaǵy jolda aqaýlar bolýynyń negizgi sebebi ankerlerdi (armatýrlardy) ornalastyrý barysynda betontóseýishke ornatylǵan kompıýter júıesiniń jańylysýy bolyp tabylady. Basqasha aıtqanda, temirbeton jamylǵysyn tóseý kezinde ankerlerdi ornalastyrýdyń araqashyqtyǵyn baqylap otyrý múmkin emes.

Búgingi kúnge «Posko Injınırıng» (Koreıa) merdiger kompanııasy QR IDM avtomobıl joldar komıtetiniń eskertpesin moıyndap, aqaýlardy óz esebinen joıý jumystaryn júrgizýde, qazirgi kezde jumys kólemi aıaqtalýǵa jaqyn. Kontraktte kórsetilgen tarmaqtarǵa sáıkes, QR IDM merdigerdi eskertpelerdi óz kúshimen joıýǵa mindettedi, olaı bolmaǵan jaǵdaıda, ıaǵnı odan bas tartsa, shyǵyn bankilik kepildeme somasynan qaıtarylatyn edi. Joldy paıdalaný barysynda keıbir ýchaskelerde aqaýlar paıda bolǵanyn eske salamyz. Sodan keıin, merdiger QR IDM avtomobıl joldary komıtetiniń, «QazJolǴZI» AQ, «QazAvtoJol» UK» AQ jáne «Ońtústikjollaboratorııa» RMB ókilderimen birlese otyryp, tsement-beton jamylǵysynda aqaýlardyń paıda bolýynyń sebepterin anyqtaý jóninde zertteýler júrgizilgen bolatyn. Aqaýlardy zerttegende olardyń bastapqy sebebi keıbir ýchaskelerde ankerlerdiń joq bolyp shyqty. Jamylǵyny qalpyna keltirý sharalaryn júrgizý barysynda barlyq ýchaskelerde ankerlerdiń bar ekendigi, biraq jobada kórsetilgen araqashyqtyqtan eptegen aýytqýshylyqtar bolǵandyǵy anyqtaldy, dep habarlaıdy QR IDM baspasóz qyzmetinen.