«Batys Eýropa-Batys Qytaı» avtodálizi boıynda taǵy bir servıstik keshen ashyldy

QYZYLORDA. QazAqparat - Búgin Qyzylorda oblysynyń ákimi Qyrymbek Kósherbaev jumys saparymen Jalaǵash aýdanynda boldy. Sapar barysynda aımaq basshysy «Batys Eýropa-Batys Qytaı» avtodálizi boıyndaǵy jeke kásipker Uzaqov Bolattyń «S» sanatyndaǵy jol boıy keshenimen tanysty, dep habarlady QazAqparat tilshisi.

Keshendi ashý saltanatynda sóz alǵan oblys ákimi, jańadan boı kóterip jatqan keshen jumysyna, oblystaǵy, aýdandaǵy atqarylyp jatyrǵan aýqymdy isterge toqtalyp, aýdan halqyn Táýelsizdik merekesimen quttyqtady.
 

«Bıznestiń jol kartasy-2020» baǵdarlamasy arqyly 115,0 mln teńge jáne jeke qarajaty esebinen 135,0 mln teńge, barlyǵy 250,0 mln. teńgege joba qarjylandyrylǵan.

Jeke kásipkerdiń «S» sanatty  Jol boıy keshenine Buqarbaı batyr aýyldyq okrýginen ótetin «Batys Eýropa - Batys Qytaı» halyqaralyq avtodáliziniń 1 715-shi shaqyrymynan 3,0 ga jer telimi tabystaldy. Keshen jobasynda jolaýshylarǵa arnalǵan dámhana, saýda pavılony, qonaq úı, 12 jeńil avtokólikke, 2 avtobýsqa, 7 júk avtokóligine arnalǵan avtoturaq qarastyrylyp otyr.

Qazirgi tańda dámhana, saýda pavılony jáne qonaq úı ǵımarattarynyń qurylysy aıaqtalyp, turǵyndar men jolaýshylarǵa qyzmet kórsetilýde jáne 6 adam turaqty jumyspen qamtyldy. Joba boıynsha barlyq nysandar iske qosylǵan ýaqytta 25 adamdy turaqty jumyspen qamtamasyz etý josparlanýda.
 

Oblys ákimi sonymen qatar, Tań aýyldyq okrýgindegi «Tań bóbegi» balabaqshasynyń jumysymen tanysyp, jergilikti qoǵamdastyq ókilderimen, atap aıtqanda máslıhat depýtattary, ardagerler, qoǵamdyq keńes tóraǵalary, kásipkerler, jastarmen kezdesý ótkizdi.

Kezdesýde oblys ákimi Q.Eleýuly 16 jeltoqsan - Táýelsizdik kúnine oraı aýdannyń áleýmettik-ekonomıkalyq damýyna ózindik úlesin qosyp júrgen birqatar azamattardy oblys ákiminiń Alǵysymen marapattady.