Batys elderi reseılik bankterdi SWIFT-ten ajyratýǵa kelisti
Ulybrıtanııa, Germanııa, Italııa, Kanada, AQSh, Frantsııa jáne Eýrokomıssııa Reseıge qarsy jańa qatań qarjylyq sanktsııalar engizýge, sonyń ishinde keıbir bankterdi aqparat berý jáne tólemderdi júzege asyrý úshin SWIFT bankaralyq júıesinen ajyratýǵa kelisti. Bul týraly senbi kúni jýrnalısterge Germanııa úkimetiniń resmı ókili Shteffen Hebestreıt málimdedi.
«Halyqaralyq qaýymdastyq sanktsııa salǵan barlyq reseılik bankter, qajet bolǵan jaǵdaıda basqa reseılik bankter SWIFT júıesinen ajyratylady», - dedi ol.
Sonymen qatar, S.Hebeshtreıttiń aıtýynsha, batystyq seriktester Reseı Ortalyq bankiniń halyqaralyq qarjylyq operatsııalar arqyly rýbl baǵamyn qoldaý múmkindigin odan ári shekteý týraly sheshim qabyldady.
«Kelisilgen sanktsııalar sonymen qatar Reseıdegi jáne Ýkraınadaǵy soǵysty qoldaıtyn basqa elderdegi jeke tulǵalar men uıymdarǵa da baǵyttalǵan. Atap aıtqanda, bul reseılik aýqattylardyń ózderine jáne jaqyndaryna alatyn «altyn tólqujatqa» jáne Eýropa azamattyǵyn alý múmkindigin shekteıdi», - dedi S.Hebeshtreıt.
«Sonymen qatar, sanktsııalardyń jyldam oryndalýyn qamtamasyz etý jáne sanktsııalarǵa ushyraǵan jeke tulǵalardyń, olardyń otbasylary men fırmalarynyń aktıvterine tyıym salý úshin AQSh pen EO ókilderiniń qatysýymen jumys toby qurylady», - dedi ol.
