«Batys barynsha kóz tigip otyr» - baspasózge sholý
« Egemen Qazaqstan » gazetiniń búgingi sanynda Elbasy Nursultan Nazarbaevtyń Ońtústik Qazaqstan oblysyndaǵy jumys sapary keńinen baıandalady.
«Memleket basshysy oblystyń kásipkerlerimen jáne aýyl sharýashylyǵy taýaryn óndirýshilermen áńgimelesip bolǵannan keıin, óńirdiń áleýmettik-ekonomıkalyq oń kórsetkishterin atap ótti. - Ońtústik Qazaqstan oblysynda agroónerkásip kesheni úshin barlyq qajetti jaǵdaı jasalǵan. Memleket aýyl sharýashylyǵyn damytý isine jan-jaqty qoldaý kórsetip, qajetti qarajat bólýde. Bes jylda óńirde 2,3 mıllıon tonna kókónis óndirildi. Qazaqstanda mundaı joǵary kórsetkishteri men tabıǵı jaǵdaılary bar basqa óńir joq. Qazir biz Eýrazııalyq ekonomıkalyq odaq elderimen shekaramyzdy ashyp jatyrmyz. Osyǵan baılanysty bizge ózimizdi ǵana emes, kórshi elderdi de ónimmen qamtamasyz etý qajet, - dedi Nursultan Nazarbaev. Memleket basshysy áńgime barysynda elimizde kólik ınfraqurylymyn damytýdyń qajettigine de nazar aýdardy. - Eger elde jaqsy joldar bolmasa, saýda damymaıdy, sáıkesinshe ekonomıka da órkendemeıdi. Sondyqtan biz qazir respýblıkanyń barlyq óńirinde kólik jelilerin salyp jatyrmyz, myńdaǵan jumys oryndary ashylýda. Ár óńirdiń aldyna naqty mindetter qoıylǵan, sony oryndaý jumystaryn jalǵastyrý qajet, - dedi Elbasy», - delingen « Múmkindik degen mine, osy! » atty maqalada.
« Aıqyn » basylymynyń búgingi sanynda Batys baıqaýshylarynyń Qazaqstandaǵy kezekten tys prezıdenttik saılaýǵa qatysatyndyǵy jaıynda málimet taratyldy.
«Batys baıqaýshylary Qazaqstandaǵy kezekten tys prezıdenttik saılaýdyń ashyq jáne ádil ótetindiginen úmittenedi. Óz kezeginde Qazaqstan EQYU baıqaýshylarynan saılaý naýqanyna ádil baǵa berýin kútedi», - delingen « Batys barynsha kóz tigip otyr » atty maqalada.
Gazettiń habarlaýynsha, keshe eýropalyq beldi uıymnyń mamandanǵan bıýrosy óz mıssııasyn ashyp, elimizdegi prezıdenttik dodany baıqaýǵa belsene kiristi. Mıssııa basshysy Kornelııa Ionkerdiń aıtýynsha, Qazaqstannyń Syrtqy ister mınıstrliginiń ulyqsatyn alǵan delegatsııa elge endigi jetti. Mıssııa quramynda 12 ekspert bar, olardyń barlyǵy Astanada jumys jasaıdy. Munyń syrtynda 30 uzaqmerzimdi baıqaýshylar kirip otyr eken, olar 31 naýryzdan bastap, búkil elimiz boıynsha bólinip, óńirlerge attanyp ketedi.
«Bizde sondaı-aq EQYU-ǵa múshe elderdiń ókilderi sanalatyn 400 qysqamerzimdi baıqaýshy bar, olar tek 25 sáýirde, saılaý ótetin kún qarsańynda keledi. Olar búkil Qazaqstan boıynsha eki adamnan quralǵan kópultty komandalarda jumys jasaıdy. Olar tek tikeleı daýys berý protsesiniń ótý barysyn, sosyn daýys sanaýdy jáne qorytyndylardy shyǵarýdy baqylaıdy. Saılaý ótkennen keıin de mıssııa mamyrdyń basyna deıin elde qalady: olar saılaý ótkennen keıingi eldegi jaǵdaıdy anyqtaıdy» dedi K.Ionker hanym.
« Aıqynnyń » « Sýret te sóıleıdi » atty kelesi maqalasynda 1812 jyly Reseı men Frantsııa arasyndaǵy soǵysqa qazaq jaýyngerleriniń qatysqandyǵy týraly qyzyqty derekter keltiriledi.
«Sol soǵystyń jylnamashysy N.Garnıch óziniń kúndeliginde «Qazaq jaýyngeriniń qolynan shyqqan shashaqty jebe jaýdyń tamaǵyna nemese kózine baryp qadalatyny bizdi de tańǵaldyrady. Olardyń at ústinde júrip dáldep atýǵa mashyqtanǵany sonshalyqty, shaýyp kele jatyp ta 15 metr jerden adam túgil, astyndaǵy atynyń kózine dál tıgizedi» dese, shaıqas dalasynda tutqynǵa túsip qalǵan Napoleon armııasynyń ýnter-leıtenanty Edýard Rıýpel árbir polkte 400-500 jaýynger bar ekenin, olardyń bári mońǵoltekti, kózi qysyq, keń ıyqty ekenin aıtqan. Frantsýz generaly De Marbo keıinirek estelikterinde «Bular orys tilin de, frantsýz tilin de bilmeıdi. Biraq maıdan dalasyndaǵy erlikterine qarasań, anasynyń jatyrynan qarý ustap týǵan tárizdi. Buryn biz kórmegen qysyq kóz, naızaly jaýyngerler oılamaǵan jerden shabýylǵa shyǵýǵa daıyn turady. Olar bizge kóp shyǵyn alyp keldi» degen jazba qaldyrypty. Bul jerde áńgime áldebir saıası múdde emes, maıdan dalasyndaǵy qazaqtar jáne oǵan qarsy jaqtyń nazar aýdarýy bolyp tur. Mysaly, sol soǵysqa kirer aldynda bolashaǵyn bilmek bolyp aldyna barǵan Napoleonǵa juldyzshysy «Seniń ajalyń jylqynyń etin jep, sútin ishetin qysyq kóz jaýyngerden bolady» degen kórinedi. Ataqty frantsýz qolbasshysynyń Reseıde emes, alystaǵy araldardyń birinde kóz jumǵanyn bilemiz. Biraq 1812 jylǵy soǵys onyń áskerı ǵumyryna núkte qoıǵany da, onda bizdiń qazaq jaýyngerleriniń qoltańbasy bolǵany da aqıqat», - delingen materıalda.
Er adamnyń ólgen barystyń janynda túsken fotosýreti barsha Kaznet paıdalanýshylaryn dúr silkindirdi, dep jazady resmı tilde shyǵatyn «Ekspress K» basylymy.
Barlyq áleýmettik jelilerdiń paıdalanýshylary Qyzyl kitapqa engen óte sırek janýardy atyp alýǵa kimniń júregi daýalaǵanyn izdep álek. Kóp uzamaı, onyń Máskeýdegi kásipkerge jáne tanymal rıeltorǵa uqsaıtyndyǵy anyqtaldy.
«Bizde Almatyda qar barysynyń sany 200-ge jýyqtaıdy», - deıdi Snow Leopard Fund qorynyń dırektory Irına Logınova. - Menińshe brakonerlerdiń qatarynda baı jáne tanymal adamdar bar. Qar barysyna ańǵa shyǵý úlken qarajat talap etedi. Árıne, olar ony ańdyp júrip, atyp ala almaıdy. Ańǵa qaqpan salady, keıin ol ustalǵanda aıaýsyz alystan atyp alady. Ańshylyqtyń bar túri osy».
Gazettiń habarlaýynsha, barysty atý qylmystyq jaýapkershilikke jatady jáne brakonerlerge 8-9 jyl bas bostandyǵynan aıyrý jazasy qoldanylýy yqtımal. Tolyǵyraq, «Kto otvetıt za barsa?» atty maqaladan oqı alasyzdar.
