batyrlargatagzym.kz portaly iske qosyldy
ASTANA. KAZINFORM - QR Mádenıet jáne aqparat mınıstrligi batyrlargatagzym.kz portalyn iske qosty.
Jobanyń negizgi maqsaty – ár batyrdyń tarıhta laıyqty tanylýyn qamtamasyz etý.
Memleket basshysy Ulttyq quryltaıdyń «Adal adam – Adal eńbek – Adal tabys» atty III otyrysynda atap ótkendeı, memleket soǵys jyldarynda teńdesi joq jaýyngerlik jáne eńbek erlikterin jasaǵan otandastarymyzdy el jadynda saqtaý boıynsha júıeli jumys júrgizýde.
Saıt ártúrli aqparat kózderinen jınaqtalǵan jáne Qazaqstan halqynyń erliginiń máńgilik eskertkishi bolyp tabylady. Pılottyq joba 2023 jyly iske qosylyp, azamattyq qoǵam men eriktilerdiń úlken qyzyǵýshylyǵyn týdyrdy. Saıttyń fýnktsıonaldyq múmkindikteri keńeıtilip, derekter tolyqqandy portalǵa júıelendi.
Búgingi tańda portalda 100 myńnan astam qazaqstandyq ardagerler týraly aqparat bar. Ekinshi dúnıejúzilik soǵystyń 80 jyldyǵyna oraı portal barlyq ardagerler týraly derekterdi biriktiredi dep úmittenemiz.
«Biz árbir qazaqstandyqty UOS ardagerleri týraly qosymsha aqparat berý arqyly bul jobaǵa óz úlesin qosýǵa shaqyramyz. Kez kelgen adam jeke otbasylyq muraǵattarda saqtalǵan qujattarmen saıtty tolyqtyrýǵa kómektese alady. Bul fotosýretter, qujattar, maıdannan kelgen hattar jáne basqa materıaldar bolýy múmkin. Bul portal – Qazaqstan Respýblıkasy Mádenıet jáne aqparat mınıstrliginiń, Memlekettik arhıvterdiń, Qazaqstan Respýblıkasy Qorǵanys mınıstrliginiń, eriktiler men azamattyq qoǵamnyń birlesken jumysynyń nátıjesi»,-delingen habarlamada.
