Batyrhan Shúkenovtyń áni janarynan aıyrylǵan Vıktorııanyń qazaqsha úırenýine túrtki boldy

Buǵan ánshi Batyrhan Shúkenovtyń óleńderiniń biri túrtki bolǵan, dep habardaıdy «QazAqparat» HAA tilshisi.

Vıktorııa «VKontakte» áleýmettik jelisindegi paraqshasyna «18 jastamyn», al Whatsapp messendjerine «Janym sol» dep qazaq tilinde statýs jazyp qoıǵan.

«Evrıka» gazetine suhbat bergen Vıktorııanyń aıtýynsha, buǵan deıin ol ǵalamtor arqyly tanysqan qazaqstandyqtardan keıbir sózderdiń aýdarmasyn surap, «sálem» men «saý boldy» úırenip alǵan. «Biraq ol kezde qatty qyzyǵýshylyq bolǵan joq. Al Batyrhan Shúkenovtyń «Otan - ana» degen óleńin estigende tula boıym shymyrlap ketti. Іshimde bolǵan sezimdi sózben jetkizý qıyn. Bálkim, ol kisiniń ómirden ozǵany da bir arnaǵa qosylyp, qatty áser etti me...Ǵajaıyp án. Batyrhan osy bir shyǵarmasyna Otan úshin barlyq maqtanysh sezimin syıǵyzdyra bildi dep oılaımyn. Sol sezimniń bir túıiri maǵan da berildi-aý deımin. Osydan keıin men qazaq tilin meńgerýge bilek sybana kiristim», - deıdi Vıktorııa Andreeva.

Osylaısha, Vıka ǵalamtor arqyly san alýan til ustartý kýrstaryn ózdigimen oqyp, qazaqsha úırene bastady. Búginde ol aýyzeki tilde óz oıyn jetkize alatyn deńgeıge jetti.

«Men ertegilerdiń ishinen Aldar Kóseni bilemin. Qyz Jibek týraly fılmdi tolyǵymen tyńdap shyqtym. Ámire Qashaýbaev, Shámshi Qaldaıaqovtyń mýzykasymen de tanystym. Muqaǵalı Maqataevtyń óleńderin oqydym. Maǵan óte unady. Iá, dál qazir bárin túsinemin dep aıta almaımyn. Degenmen, maqamnyń ózi adamdy tartady. Shyǵystyń jumbaq tabıǵaty barynsha seziledi», - deıdi ol.

Vıktorııa qazaqstandyq estradany da jaqsy biledi. Búginde ol aqtóbelik bir qyzben ǵalamtor arqyly tyǵyz aralasyp turady. Jerlesimiz oǵan qazaq tilin meńgerýge kómektesip júr. Vıktorııa gazet arqyly sol úshin óz alǵysyn jetkizdi. «Reseılikterge qaraǵanda sizder ashyq ári meıirimdisiz. Árıne, ártúrli adamdar bolady. Degenmen, maǵan sondaı adamdar kezigedi», - deıdi Vıka.