Batyrhan Shúkenovtiń uly Nıý-Iorkte ótken ákesiniń eske alý keshine bardy
ASTANA. QazAqparat - Nıý-Iorkte ánshi, kompozıtor Batyrhan Shúkenovti eske alý keshi ótti.
QR Mádenıet qaıratkeri Shúkenov BUU Balalar qorynyń erikti elshisi boldy. Ol kózi tiri kezinde bul qalaǵa jıi barǵan jáne BUU shtab-páterindegi is-sharalarǵa qatysyp turǵan. Sondyqtan dostary men týystary eske alý keshin Nıý-Iorkte ótkizdi.
Qazir ánshiniń uly Maqsut anasymen birge Florıda qalasynda, al ustazy Vladımır Zaslavskıı Nıý-Djersıde turady. Sonymen birge AQSh, Los-Andjeles, Vashıngtonda da onyń kóptegen dostary bar. Olardyń barlyǵy eske alý keshine jınaldy, dep jazady baistars.kz.
Ánshiniń Amerıkakadaǵy tyńdarmandary men Qazaqstandaǵy áriptesteri Batyrhan Shúkenovtiń qapyda bolǵan qazasyna áli de qaıǵyrýda. Kesh barysynda qazaqstandyq Janna Orynbasarova, Altynaı Saparǵalıeva ánshiniń «Djýlııa», «Tvoı shagı», «Nelıýbımaıa» syndy ánderin shyrqaǵanda jınalǵandar kózderine jas aldy.
«Batyrdyń qazasy men úshin aýyr tıdi. Ómirimniń bir bólsheginen aıyrylǵandaı boldym. Biraq ekeýmiz biraz ýaqyq birge jumys jasadyq. Sondyqtan ózimdi baqytty adammyn dep esepteımin. Biz birge gastroldik saparlarǵa, túrli baıqaýlarǵa barǵanbyz. Ol juldyz bolǵan kezinde de ózgergen emes»,- dep eske aldy ustazy Vladımır Zaslavskıı.
«Batyr álem adamy boldy. Qazir ortamyzda onyń joqtyǵy bilinedi. Biraq júregimizde máńgi qalady. Onyń ánderin eshqashan umytpaımyz», - dedi óz kezeginde Janna Orynbasarova.
