Batyrhan Shúkenovtiń sońǵy armany oryndaldy
ASTANA. QazAqparat - «Qazaqstan» ulttyq telearnasy Astana kúnine oraı Batyrhan Shúkenovtiń oryndaýyndaǵy «Júregimde Astana» atty ánniń klıpiniń premerasyn ótkizdi.
«Qazaqstan RTRK» AQ Basqarma tóraǵasynyń orynbasary Qaınar Oljaıdyń aıtýynsha, Batyrhan Shúkenovtiń sońǵy armany - osy ánge klıp túsirý bolǵan eken.
«Korporatsııa Astana kúnine arnap, jyl saıyn bir-bir beınebaıan túsirýdi qolǵa alǵanbyz. Bul 2013 jyly bastalǵan úrdis bolatyn. Tek qana tańdaýly, tek qana Astanaǵa arnalǵan eń úzdik shyǵarmaǵa jylyna bir-aq ret beınebaıan túsirip kelemiz. Birinshi ret Rınat Gaısınniń «Astana - meniń maqtanyshym» atty mýzykalyq premerasyn usynǵan bolatynbyz. Ekinshi jyly Aıman Musaqojaevanyń «Ánshiler akademııasy» degen týyndysyna klıp túsirdik. Bıylǵy klıpti erekshe daryn ıesi, qaıtalanbas ánshi, keremet uıymdastyrýshy, halyqtyń súıiktisine aınalǵan Batyrhan Shúkenovtiń sońǵy týyndysyna arnaýdy jón kórdik. Onyń sońǵy armany - osy ánge klıp túsirý edi», - deıdi Q.Oljaı.
Jalpy, bul án ótken jyly Batyrhan Shúkenov atyndaǵy Qoǵamdyq qordyń arnaıy shyǵarǵan «Amanat» atty sońǵy albomyna kirgen. Beıneklıp Astananyń túrli aımaqtarynda túsirilgen jáne onda elordanyń eń kórikti degen jerleri men eń záýlim ǵımarattary kórinis tapqan. Otandyq kınematografııa salasynda alǵash ret arnaıy effektilerdi jasaý maqsatynda anamorfotty kınoobektıvter paıdalanylǵan. Túsirilimge Roza Rymbaeva, Medeý Arynbaev, Mádına Sádýaqasova, Maqpal Isabekova, Maıra Muhamedqyzy, Dılnaz Ahmadıeva, qatysqan.
Ánniń sózin aqyn Shómishbaı Sárıev jazsa, áýeni kompozıtor Renat Gaısındiki. Beınebaıan búginnen bastap telearnalar men ınternet jelisinde paıda bolady.
