Batyrhan Shúkenovtiń ánderi telearnada onlaın shyrqaldy
NUR-SULTAN. QazAqparat – Tanymal ánshi Batyrhan Shúkenovtiń týǵan kúnine oraı «Habar» arnasynda ánshiniń jankúıerleri erekshe fleshmob ótkizdi. Ánshiniń shyǵarmashylyǵyn saǵynǵandar onyń repertýaryndaǵy tanymal týyndylardy onlaın rejımde birge shyrqady, dep habarlaıdy QazAqparat tilshisi.
Batyrhan Shúkenov tiri bolsa búgin 58 jasqa tolar edi. Onyń ómirden ótkenine bıyl bes jyl ótti. Áıtse de ánshiniń kózi ketkenimen, onyń áni men shyǵarmashylyǵy máńgilik ólmeske aınaldy.
«Batyrdyń ánderin birge shyrqaıyq» atty aktsııaǵa otandastarymyz ǵana emes, shetelden jankúıerler de qatysty. Birinshi bolyp onlaın rejımdegi aktsııaǵa astanalyqtar qosyldy. «Qazaqstan» ortalyq kontsert zalynyń ǵımaratynda elimizge belgili óner qaıratkerleri «Otan Ana» ánin oryndady.
Almatyda aktsııaǵa óner qaıratkerleri men jastar atsalysty. Respýblıka saraıynyń aldynda aktrısa Bıbigúl Súıinshalına, Dına Tasbolatova, sondaı-aq Roman Kım «Djýlııa» ániniń birinshi shýmaǵyn áýelete shyrqady. Bul ándi Bishkektegi jankúıerler ilip áketip, aktsııa halyqaralyq sıpatqa ıe boldy.
Batyrhan Shúkenov Qyzylorda óńiriniń týmasy. Ánshiniń týǵan kúninde Qyzylordada jastar men mádenıet salasynyń ókilderi, Batyrhannyń týǵan-týystary bas qosty. Olardyń árbiriniń qolynda ánshiniń portreti boldy. Olar tikeleı efırde «Qaıran kóńil-aı» kompozıtsııasyn oryndady.
