Batyrhan Shúkenovke QazUÓÝ-de stýdentterge sabaq berýdi usynǵan bolatynmyn - A. Musaqojaeva
ASTANA. QazAqparat - Qazaq ulttyq óner ýnıversıtetiniń rektory, QR halyq ártisi Aıman Musaqojaeva Batyrhan Shúkenovke stýdentterge dáris berýdi usynǵandyǵyn aıtty.
Búgin jýrnalısterge bergen suhbatynda A. Musaqojaeva belgili ánshiniń qazasyna qatty qaıǵyrǵanyn jetkizdi.
«Men úshin bul óte qaıǵyly habar boldy. Batyrhan áli tym jas edi. Onyń barlyq jetistikteri áli alda bolatyn. Tipti ol óz sheberligin jas ánshilerge úıretýdi josparlaǵan. Men ony únemi bizdiń ýnıversıtetke shaqyryp: «Qazaq estradasynyń qalaı damýy kerek ekenin sen bilesiń. Sen oǵan qalaı qol jetkizýdi de bilesiń. Sondyqtan sen jastarǵa jol kórsetýiń kerek. Sen bizge qajetsiń. Bizge osy joldy júrip ótken ustazdar men tálimgerler kerek» deıtinmin, - dedi A. Musaqojaeva.
Onyń aıtýynsha, Batyrhan únemi bul usynysty qosh kórip, alaıda ázir qoly tımeıtinin, kontserti kóp ekenin, biraq bolashaqta pedagogtyq jolǵa túsetinin aıtady eken.
QazUÓÝ rektorynyń sózinshe, B. Shúkenov ár ýaqytta Qazaqstandy tek Reseı tyńdarmandaryna ǵana emes, kóptegen sheteldikterge de jaqsy jaǵynan tanytyp júrdi.
«Reseılik áriptesteri ol týraly tek jaqsy sózder aıtatyn. Meniń synyptasym Baıǵalı Serkebaev jáne basqa da dostarym Batyrhannyń Reseı men basqa da shet elderde Qazaqstannyń atyn asqaqtatyp júrgenin maqtanyshpen aıtatyn. Biraq men Batyrhandy bárinen buryn Qazaqstanmen baılanystyrǵym keletin. Meniń oıymsha, onyń júregi ómir boıy tek Qazaqstan dep soqty», - dedi A. Musaqojaeva.
Esterińizge sala keteıik, belgili ánshi B. Shúkenov Máskeýdegi páterinde júrek talmasynan kóz jumdy. Ol Almatyda jerlenetin bolady.
