Batyrhan Shúkenovke arnalǵan «Jańǵyryq» beınebaıany tanystyryldy
ALMATY. QazAqparat - Búgin Gakku telearnasynyń saıtynda Álı Oqapovtyń Batyrhan Shúkenovke arnaǵan «Jańǵyryq» kompozıtsııasy beınebaıanynyń kópten kútken premerasy bolyp ótti.
Eske sala keteıik, ánniń ózi jáne beınebaıannyń tızeri bir apta buryn shyqqan.
«Jańǵyryq» kompozıtsııasyn ánshi shyǵarmashylyǵyn súıýshilerdiń kóbi kútken. Álı Oqapov pen Batyrhan Shúkenovtyń birigip án jazbaq ekeni kóktemde belgili bolǵan. Biraq qaıǵyly oqıǵaǵa baılanysty bul jumys aıaqtalmaı qaldy. «Men birlesip án jazýdy usyndym, ol kelisti. Máskeýdegi jańa stýdııasynyń fotosýretterin, adamdardyń baılanys nómirlerin jibere bastady. Maǵan: «Jumys jasaıyq, bul qyzyqty bolady» dedi. Ókinishke qaraı, barlyǵy demo-nusqasynda qaldy. Biz vokaldy jazyp úlgermedik. Shaǵyn birdene bolsa da, odan án shyǵarar edim. Іsti bastaǵan soń, ol Batyrǵa unaǵan soń, men bul ándi aıaqtap, oǵan arnaımyn», - dedi Á.Oqapov Gakku telearnasyna bergen suhbatynda. Ideıanyń avtory - Israıl Saparbaev, kompozıtorlary Shyryn Bazarqulova men Álı Oqapovtyń ózi boldy. Beınebaıanǵa Batyrdyń dostary - Roza Rymbaeva, Bolat Syzdyqov, Renat Ǵaısın, Dilnaz Ahmadıeva, Maqpal Isabekova jáne JSC tobynyń solısi Abaı Raqyshev túsken. Beınebaıandy jasaýshylar Batyrhan Shúkenov atyndaǵy qorǵa usynǵan materıaldar men kórsetken qoldaýy úshin alǵysyn bildirdi.
