Batyrhan Shúkenovke arnalǵan «Otan-Ana» baıqaýynyń jeńimpazdary belgili boldy
QYZYLORDA. QazAqparat - Qyzylorda qalasynda ánshi-kompozıtor Batyrhan Shúkenovti eske alýǵa arnalǵan «Otan-Ana» respýblıkalyq ánshiler baıqaýy máresine jetti. Bas júlde Ońtústik Qazaqstan oblysynyń Kentaý qalasynan kelgen Erik Tólenovke buıyrdy, dep habarlaıdy QazAqparat tilshisi.
Óner baıqaýynda elimizdiń birqatar óńirlerinen kelgen 16-30 jas aralyǵyndaǵy 130-dan astam jastar synǵa tústi. Olar alǵashqy kezeńinde erkin taqyrypta án shyrqasa, kelesi kezeńde Batyrhan Shúkenovtiń repertýarynan bir án oryndady. Ádilqazylr alqasynyń quramynda kompozıtor, prodıýser Rınat Gaısın, ánshi-kompozıtor Rústem Nurjigit, QR Eńbek sińirgen qaıratkeri Dılnaz Ahmadıeva jáne prodıýser, B.Shúkenov atyndaǵy qordyń dırektory Oljas Baıqanov boldy.
Aıta keterligi, baıqaýda mınýsovkada bek-vokaldy qoldanýǵa ruqsat berilgen joq. Bul ónerpazdardyń tabıǵı daýysyn, shynaıylyǵyn ádil tarazylaýǵa múmkindik týǵyzdy.
«Batyrhan aǵamyz árdaıym jastarǵa úlgi bola bildi. Búgingi baıqaýda qobaljyǵanym ras. Óıtkeni, ol kisi oryndaǵan ánder - deńgeıi óte joǵary týyndylar», dedi baıqaýdyń bas júldesin ıelengen E.Tólenov.
Qazylar alqasynyń sheshimimen birinshi oryn Gúlnar Kóshenovaǵa buıyrsa, ekinshi oryndy aqtóbelik Aıymbek Sartýkov aldy. Úzdik úshtikti Indıra Báıimbetova túıindedi. Ózge de ónerpazdarǵa arnaıy marapattar tabystaldy.
«Onyń juldyzdy ómiri bizge ónerge degen qyzmettiń jarqyn úlgisin kórsetti. Batyrhannyń eńbeksúıgishtigin barlyǵymyz ónege tutamyz», dedi R.Gaısın.
Biz budan buryn Batyrhan Shúkenovtiń esh jerde oryndalmaǵan 13 áni jınaqtalǵan jańa albomy jaryqqa shyǵatynyn habarlanǵan edik.
Búgin, 18 mamyrda tústen keıin Qyzylorda qalasynda B.Shúkenovke arnalǵan eskertkish ashylady dep kútilýde.
Ádiljan Úmbet
