Batyrhan Shúkenov túsken «Oqytýshy» jastar komedııasy prokatka shyqty

ASTANA. 2 mamyr. QazAqparat - Búgin «Oqytýshy» mýzykalyq komedııasy qazaqstandyq kórermenderge jol tartty.

Týyndyda Kamılanyń (16 jastaǵy ártis Ajar Ibraeva) jáne Armannyń («Orda» tobynyń ánshisi Dastan Orazbekov) mahabbaty jaıly baıandalady. Jigit stýdent boıjetkenge es-tússiz ǵashyq bolady. Ony ózine qaratyp, júregin jaýlap alý úshin oqytýshynyń keıpine enýdi uıǵarady. Fılmniń bas keıipkeri úshin bul syryn búgip qalý ońaıǵa soqpaıdy.

«Oqytýshynyń» mýzykasyn tanymal ánshi jáne kompozıtor Batyrhan Shúkenov jazdy, sol sondaı-aq, fılmde qosalqy rólderdiń birin somdady. Kartınada aıtylatyn negizgi ánderdi ýkraınalyq Darıa Gromova men X-Factor baıqaýynyń jeńimpazy Dárııa Ǵabdýll shyrqaıdy.

Týyndynyń rejısserleri - Baltyq jaǵalaýy elderiniń klıpmeıkerleri Vıktor Vılks jáne Slavomır Leontev. «Qazaqfılm» AQ-nyń tapsyrysymen Vox Pictures kompanııasy túsirgen mýzykalyq komedııanyń bıýdjeti 1,5 mıllıon AQSh dollaryn quraıdy.