Batyrhan Shúkenov atyndaǵy shákirtaqy taǵaıyndaldy
ALMATY.QazAqparat - Qurmanǵazy atyndaǵy Qazaq ulttyq konservatorııasynda Batyrhan Shúkenov atyndaǵy shákirtaqy úshin qoıylatyn talaptar jarııalandy, dep habarlaıdy QazAqparat tilshisi.
Qurmanǵazy atyndaǵy Qazaq ulttyq konservatorııasy úrmeli jáne urmaly aspaptar kafedrasynyń stýdentteri arasynan asqan talanttardy izdeıdi. Olar Batyrhan Shúkenov atyndaǵy shákirtaqyǵa ıe bolady.
«Biz úrmeli aspaptarda oınaıtyn jas mýzykanttarǵa qoldaý kórsetkimiz keledi. Sebebi Batyr saksafonnyń klassıkalyq oryndaýshysy bolyp edi. Mýzykalyq aspaptyń bul túrin nasıhattaýda stýdentterge materıaldyq turǵydan kómektesýge daıynbyz. Bolashaqta túrli baıqaýlar men festıvalderge baramyz dese jol pulyn da beremiz. Bizdiń basty maqsat - talantty oryndaýshylardy tabý. Mýzykalyq aspaptardyń sırek túrinde oınaıtyndar sahnadan kórine bermeıdi. Sondyqtan olar keleshekte Qazaqstandyq oryndaýshylyq ónerge óz úlesterin qossa deımiz», - dedi belgili artıstiń aǵasy ári B.Shúkenov atyndaǵy qor keńesiniń tóraǵasy.
Jobaǵa qarjylyq qoldaý kórsetken Bolat Ótemuratov qory. 2018-19 oqý jyly boıynsha árbir stýdentke 500 000 teńgeden 5 shákirtaqy bólingen. Shákirtaqyǵa konservatorııanyń úrmeli aǵash aspaptary men jez mýzykalyq aspaptary fakýltetiniń stýdentteri (bakalavr stýdentteri, magıstrler, doktoranttar) úmitker bola alady.
Shákirtaqy alýshylardy irikteý úsh kezeń boıynsha júrgiziledi. Birinshi kezeń - ótinishterdi qabyldaý 23 qyrkúıekke deıin jalǵasady. Olardy óńdeý, ıaǵnı ekinshi kezeń 28 qyrkúıekke deıin; úshinshi kezeń - sheshim 2 qazanda jarııalanady.
Jumys beınejazba túrinde Youtube, Vimeo jelilerine júktelgen soń, baıqaýǵa silteme arqyly joldanady. Beınejazba ýaqyty 5 mınýttan aspaýy kerek. Jazba ótinish túsirgen kúnge deıin 1 jyl ishindegi shyǵarma bolýy tıis.
Shákirtaqy ıeleri táýelsiz qazylar alqasy sheshimimen jarııalanady. Nátıjeni konservatorııa saıtynan qazan aıynda bilýge bolay.
Bolat Ótemuratov atyndaǵy qor budan ózge taǵy birqatar jobaǵa qoldaý bildirmek. Aldaǵy kúnderge ánshiniń qaza tilindegi shyǵarmalarynyń notalyq tanystyrylymy men úrmeli aǵash aspaptar konkýrsy, sondaı-aq Batyrhan Shúkenovtyń jeke albomdarynyń CD/DVD baspasynyń shyǵarylymdary josparlanǵan.
