Batyrǵalı Ábilmansur karateden Álem chempıony boldy
NUR-SULTAN. QazAqparat – Chılıde karateden jastar arasyndaǵy Álem chempıonaty jalǵasýda. Qazaqstan qorjynyna alǵashqy «altyn» men bir qola medal tústi, dep habarlaıdy QazAqparat.
QR Ulttyq Olımpıadalyq komıtetinen málim etkendeı, jasóspirimder arasyndaǵy 2018 jylǵy Olımpıada oıyndarynyń júldegeri Batyrǵalı Ábilmansur qarsylas shaq keltirmedi. 67 kelige deıingi salmaq sanatynda (U-21) óner kórsetken ol Aýstralııa, Reseı, Brazılııa, Marokko jáne Túrkııa elderiniń sportshylarynan basym boldy.
Al 60 kelige deıingi salmaqtaǵy qazirgi álem chempıony Erkinbek Baıtóreev óz tıtýlyn qorǵaı almaı, shırek fınalda grek sportshysy Ksenos Stefanosqa ese jiberdi. K.Stefanos keıin álem birinshiliginiń jeńimpazy boldy. Baıtóreev «qola» úshin jekpe-jekterde Úndistan men Chernogrııadan kelgen karateshilerdi senimmen jeńe aldy.
