Batyr Júkembaevtyń jekpe-jegin qazaqstandyqtar tikeleı efırden kóre alady

NUR-SULTAN. QazAqparat - Qazaqstandyq kásipqoı boksshy Batyr Júkembaevtyń (15-0, 12KO) Monrealda (Kanada) ótetin aıqasyn qazaqstandyqtar «Habar» arnasynan kóre alady, dep habarlaıdy QazAqparat tilshisi.

«Birinshi ortasha salmaqtaǵy jekpe-jek 17 mamyr kúni 10 raýndtyq formatta ótedi. Nur-Sultan ýaqyty boıynsha aıqas 18 mamyr kúni saǵat 07.00 kezinde bastalady. Kezdesýdi «Habar» arnasynan tamashalańyzdar», - delingen «Qazaqstan kásipqoı boksynyń» VKontakte paraqshasynda.

Eske sala ketsek, Batyr Júkembaevtyń kelesi qarsylasy anyqtalǵanyn buǵan deıin habarlaǵan bolatynbyz. Montreal Casino oıyn-saýyq kesheninde Júkembaev jartylaı orta salmaqtaǵy 10 raýndtyq jekpe-jekte 30 jastaǵy meksıkalyq Lýıs Hesýs Vıdalespen (13-6, 6KO) judyryqtasady. Vıdales 2011 jyldan beri kásipqoı boksta. Bir kezdesýden basqasynyń bárin ol boksshy Meksıkada ótkizgen.