Batyr Júkembaevtyń qarsylasy aıaq astynan aýystyryldy

NUR-SULTAN. QazAqparat – Úsh kúnnen keıin sharshy alańǵa kóterilgeli turǵan qazaqstandyq kásipqoı boksshy Batyr Júkembaevtyń qarsylasy aıaq astynan aýysyp ketti, dep habarlaıdy QazAqparat tilshisi «Qazaqstan kásipqoı boksy» federatsııasyna silteme jasap.

Batyr Júkembaev (17-0, 13 KO) basty aıqasta shyǵatyn Kanadadaǵy boks keshine barlyq bıletter satylyp ketkenin buǵan deıin habarlaǵan edik. Sondaı-aq boksshynyń IBF Latino chempıony argentınalyq Maksımılıano Rıkardo Veronǵa (12-3-1, 4 KO) qarsy aıqasatyny jarııalanǵan bolatyn. Alaıda, kanadalyq BAQ-tyń habarlaýynsha, otandasymyz «Rıkı» laqap atty meksıkalyq Rıkardo Laramen (22-7, 10KO) kezdesedi.

25 qańtarda ótetin aıqasta qazaqstandyqqa tıesili birinshi orta salmaqtaǵy WBA Continental Americas pen IBF Inter-Continental tıtýldary sarapqa salynady.

Esterińizge sala keteıik, Batyr Júkembaev byltyr 26 qyrkúıek kúni Monrealda meksıkalyq Mıgel Vaskeske qarsy (41-9, 15 KO) ótkizgen sońǵy judyryqtasýynda tóreshilerdiń biraýyzdy sheshimimen jeńiske jetti. Halyqaralyq boks uıymynyń (IBO) reıtınginde ol óz salmaǵynda 11-shi orynda tur.