Batyr Júkembaev pen «Kotto» salmaq ólsheý rásiminen ótti

NUR-SULTAN. QazAqparat - Qazaqstandyq boksshy Batyr Júkembaev meksıkalyq Lýıs Hesýs Vıdalespen (13-6, 6KO) jekpe-jegi aldynda salmaq ólsheý rásiminen ótti. Bul týraly VKontakte áleýmettik jelisindegi «Qazaqstannyń kásipqoı boksy» paraqshasynda habarlandy.

Júkembaev Instagram-da vıdeo júktep: «Salmaq oryndaldy» dep jazdy. Sondaı-aq ol qarsylasymen ótken kóz arbasý rásiminen vıdeony usyndy.

Batyr Júkembaevtyń kelesi qarsylasy anyqtalǵanyn buǵan deıin habarlaǵan bolatynbyz. Jartylaı orta salmaqtaǵy 10 raýndtyq jekpe-jek Kanadanyń Monreal qalasyndaǵy Montreal Casino oıyn-saýyq kesheninde ótedi. «Kotto» laqap atymen belgili meksıkalyq Lýıs Hesýs Vıdales 30 jasta. Ol 2011 jyldan beri kásipqoı boksta. Bir kezdesýden basqasynyń bárin Meksıkada ótkizgen. Júkembaev sońǵy aıqasyn dál osy Monreal qalasynda ótkizip, meksıkalyq Hılberto Mesany (10-5-1, 6 KO) tóreshilerdiń biraýyzdy sheshimimen jeńgen edi.

Jekpe-jekti «Habar» arnasy tikeleı efırden kórsetedi. Bastalýy - Nur-Sultan qalasynyń ýaqytymen 18 mamyr, saǵat 07.00.