Batyr Júkembaev nokaýtqa túsirýdiń qupııasyn ashty
Boksshy kásipqoı rıngte osyǵan deıin ótkizgen 13 jekpe-jeginiń barlyǵynda jeńiske jetken, 11 qarsylasyn nokaýtqa jibergen. Taǵy bir aıta keterligi, Batyr kezdesýleriniń barlyǵyn Kanadada ótkizgen.
«Et pen qymyzdy saǵyndym. Múmkindik boldy degennen-aq Otanǵa oralyp, ýaqytymdy otbasymmen birge ótkizgim keledi... Eki jylda Kanadadaǵy ómirge de beıimdeldim, Monrealda turamyn. Kanadalyqtar da qazaqtar sııaqty qonaqjaı halyq. Ol jaqtaǵy qazaqtarmen dostasyp aldym, baılanysty úzbeımiz», - deıdi Batyr Júkembaev.
Boksshy IBO International jáne WBC Continental Americas tıtýldaryna qol jetkizý úshin kóp eńbektený qajettigine toqtaldy.
«Árbir boksshy alǵashqy jeńisterin, beldikterin este saqtaıdy. Olardy jeńý maǵan ońaı bolǵan joq. IBO International beldigin alý da úlken jetistik. Biraq munymen toqtap qalmaımyn. Óz salmaǵymnyń absolıýttik chempıony bolǵym keledi. Biraq bári de maǵan baılanysty emes. Kimmen aıqasatynymdy promoýterler men menedjerler sheshedi. Eger «Erteń-aq rıngke shyǵýǵa daıynsyń ba?» dep surasa, senimdi jaýap beremin», - deıdi Batyr Júkembaev.
Batyrdyń aıtýynsha, kanadalyq jankúıerler ony «ózimizdiki» dep ataı bastaǵan.
«Meniń sońǵy jekpe-jekterim záýlim sport kesheninde boldy. Jankúıerler qoltańba surap, birge sýretke túsýdi usynady. Árıne, AQSh-ta kezdesý ótkizýdi josparlap júrmin. Biraq ol úshin HBO jáne ESPN telearnalarymen kelisimshart jasasý qajet», - deıdi ol.
Júkembaev sońǵy jeti qarsylasyn nokaýtpen jeńgen.
«Kásipqoılar arasynda ártúrli boksshylar bar. Keıbireýler shoý kórsetkisi keledi, endi bireýler qarsylasyn «óltire salady». Maǵan tópelete shabýyldaǵan unaıdy. Kúshke salyp urý - meniń stıldik ereksheligim. Degenmen sońǵy kezdesýlerde qarsylastarymdy erte nokaýtqa jiberýdi maqsat etpegen edim. Biraq osylaı aıaqtaldy», - deıdi Batyr Júkembaev.
