Batyr Júkembaev eks-chempıonmen judyryqtasatyn boldy

NUR-SULTAN. QazAqparat – Kásipqoı boksta birinshi jartylaı orta salmaqta óner kórsetip júrgen qazaqstandyq Batyr Júkembaev (16-0, 13 KO) kelesi jekpe-jegin 26 qyrkúıekte Kanadanyń Monreal qalasynda ótkizedi, dep habarlaıdy QazAqparat tilshisi.

Bul týraly ol óziniń facebook paraqshasynda habarlady.

«Assalaýmaǵaleıkúm barshańyzǵa! Meniń kelesi jekpe-jegim 26-qyrkúıekte. Eks-chempıonmen ótetin aıqasym - men úshin úlken synaq! Alla qalasa álem chempıony ataný deıtin uly maqsatyma bir taban jaqyndaı túsemin. Ol qansha azýly bolsa da, qazaq eliniń namysy maǵan kúsh-qýat syılaıdy! Qoldaýlaryńyzǵa rahmet!», dep jazdy ol jeke paraqshasynda.

Tolyqtyryp aıta ketsek, Júkembaev kelesi aıqasyn meksıkalyq 32 jastaǵy Mıgel Vaskesqa (41-8, 15 KO) qarsy ótkizedi. Ol 2010-2014 aralyǵynda jeńil salmaqta IBF tujyrymy boıynsha álem chempıony bolǵan. Jekpe-jek - birinshi orta salmaqta 10 raýndtan turady.

Aıta keteıik, 26 qyrkúıekte ótetin boks keshinde taǵy úsh qazaqstandyq sportshy óner kórsetedi: Sadrıddın Ahmedov (9-0, 8 KO), Nurzat Sabyrov (10-0, 9 KO) jáne Aman Qazanǵapov (0-0-1). Olardyń qarsylastary keıin anyqtalady.