Batyr Baýyrjan Momyshuly týraly jańa derekti fılm jaryqqa shyqty
ALMATY. Qyrkúıektiń 14-i. QazAqparat /Erbol Turymbetov/ - Búgin Almatydaǵy «Tsezar» kınoteatrynda rejısser Qalıla Omarovtyń «Qazaqtyń Baýyrjany» atty jańa derekti fılminiń tusaýkeseri bolyp ótti,
dep habarlaıdy QazAqparat.
Derekti fılm QR Mádenıet mınıstrliginiń tapsyrmasy boıynsha Sh. Aımanov atyndaǵy «Qazaqfılm» AQ kınostýdııasynda túsirilgen. Fılmdi túsirýge «Qazaqfılm» AQ prezıdenti Ermek Amanshaev, Baýkeńniń uly men kelini - jazýshy Baqytjan Momyshuly men tarıhshy Zeınep Ahmetova, Taraz qalasyndaǵy «Baýyrjantaný» ǵylymı-zertteý ortalyǵynyń mamandary, Aýǵan soǵysy ardagerleri keńesiniń tóraǵasy Baqytbek Smaǵul, professor, polkovnık Kım Serikbaev jáne t. b. qoldaý bildirgen.
«Fılmdi jasaýda halyqtyń jadynda saqtalyp qalǵan uly tulǵa týraly tarıhı derekter óte kóp boldy. Almatyda Baýkeńniń qara shańyraǵy bar. Qazir onda uly men kelini turady. Sol sııaqty ár jerde halyqtyń esinde qanshama estelikter bar. Budan burynǵy KSRO kezinde Baýkeń týraly tek soǵys ardageri retinde fılm túsirilip kelgen bolsa, bul fılmde ol kisini Alash zııalysy retinde, ulttyń uly tulǵalarynyń biri retinde kórsetýge tyrystyq», deıdi Q. Omarov.
Túsirý jumystary 6 aıda Almaty, Taraz, Shymkent, Máskeý jáne t. b. qalalarynda júrgizilgen. Uzaqtyǵy 30 mınýt. Fılmde Baýyrjan Momyshulynyń balalyq shaǵynan bastap, onyń egde tartqan shaǵyna deıin jáne uly adamnyń otbasy men ishki bolmysy, jan-dúnıe álemi sýretteledi. Týyndy áli esh jerde jarııalanbaǵan tyń derekterden quralǵan.
